დღეს, 18 ნოემბერს ახალქალაქში ქართული ოცნების მიერ მხარდაჭერილი საპრეზიდენტო კანდიდატის, სალომე ზურაბიშვილის წინასაარჩევნო კონცერტი გაიმართა. ღონისძიებაში მონაწილეობდნენ პარლამენტის დეპუტატები, მინისტრები, მათ შორის, იუსტიციის მინისტრი, თეა წულუკიანი და სახელმწიფო მინისტრი შერიგების საკითხებში, ქეთი ციხელაშვილი. წინასაარჩევნო ღონისძიებაში მონაწილეობა არ მიუღია თავად საპრეზიდენტო კანდიდატს.

ქალაქის ცენტრში მოწყობილ დიდ სცენაზე ქართული ოცნების ლიდერები სიტყვით გამოდიოდნენ და ახალქალაქელებს სალომე ზურაბიშვილის მხარდაჭერისკენ მოუწოდებდნენ. ქართული ოცნების პრესსამსახურში On.ge-ს უთხრეს, რომ არ იციან მიზეზი, თუ რატომ არ დაესწრო ღონისძიებას პირადად სალომე ზურაბიშვილი.

სალომე ზურაბიშვილი საკუთარი კანდიდატურის მხარდამჭერ კონცერტებს არ დაესწრო, არც ქუთაისში და არც ბათუმში. ღონისძიებების ფეისბუქლაივი მხოლოდ ქართული ოცნების ოფიციალურ გვერდზე გადაიცემოდა და არა საპრეზიდენტო კანდიდატის.

კონცერტების გარდა, სალომე ზურაბიშვილი თავის საარჩევნო ბანერებზეც აღარ ჩანს. ჟურნალისტებს კი მან განუცხადა, რომ "არის ყველგან, სადაც საჭიროა".

15 ნოემბერს დილიდან თბილისსა და ბათუმში სალომე ზურაბიშვილის მხარდამჭერი ბანერები გამოჩნდა, რომელზეც თვითონ ზურაბიშვილის ნაცვლად ქართული ოცნების თავმჯდომარე, ბიძინა ივანიშვილი, პარლამენტის თავმჯდომარე, ირაკლი კობახიძე და პრემიერ-მინისტრი, მამუკა ბახტაძე არიან გამოსახული.

პარტია ქართული ოცნება ბილბორდებზე ლიდერების გამოჩენას პარტიის ახალი სტრატეგიით ხსნის. პარტიაში აცხადებენ, რომ მეორე ტურის კამპანიის ფარგლებში განახლდა სალომე ზურაბიშვილის საარჩევნო სლოგანიც. "ერთად საქართველოსთვის" "პრინციპულმა არჩევანმა" ჩაანაცვლა.

ამასთანავე, ფეისბუქით გავრცელდა სალომე ზურაბიშვილის ახალი საარჩევნო კლიპი, რომელშიც მმართველი გუნდის მხოლოდ კაცი ლიდერები მონაწილეობენ. აღნიშნული კლიპი სალომე ზურაბიშვილის არც ერთ ფეიჯზე არ არის განთავსებული და არც გადაზიარებულია.