დღეს, 16 ნოემბერს ქუთაისში საპრეზიდენტო კანდიდატის, სალომე ზურაბიშვილის მხარდამჭერი კონცერტი გაიმართა. ღონისძიებაში მონაწილეობდნენ საზოგადოებისთვის ცნობილი სახეები, თუმცა თავად საპრეზიდენტო კანდიდატი — არა.

ეს პირველი შემთხვევა არაა, როცა ზურაბიშვილი კონცერტს არ დაესწრო. მსგავსი შემთხვევა იყო ბათუმშიც 14 ნოემბერს. ორივე კონცერტის ფეისბუქლაივი მხოლოდ ქართული ოცნების ფეიჯზე გადაიცემოდა, თუმცა არა საპრეზიდენტო კანდიდატის

ამასთან დაკავშირებით On.ge საპრეზიდენტო კანდიდატის პრესსამსახურს უკავშირდებოდა, თუმცა ისინი ჩვენს ზარებს არ პასუხობენ. ასევე, ზარებს არ პასუხობენ ქართული ოცნების პრესსამსახურში.

კონცერტების გარდა, სალომე ზურაბიშვილი თავის საარჩევნო ბანერებზეც აღარ ჩანს. ჟურნალისტებს კი მან განუცხადა, რომ "არის ყველგან, სადაც საჭიროა".

15 ნოემბერს დილიდან თბილისსა და ბათუმში სალომე ზურაბიშვილის მხარდამჭერი ბანერები გამოჩნდა, რომელზეც თვითონ ზურაბიშვილის ნაცვლად ქართული ოცნების თავმჯდომარე, ბიძინა ივანიშვილი, პარლამენტის თავმჯდომარე, ირაკლი კობახიძე და პრემიერ-მინისტრი, მამუკა ბახტაძე არიან გამოსახული.

პარტია ქართული ოცნება ბილბორდებზე ლიდერების გამოჩენას პარტიის ახალი სტრატეგიით ხსნის. პარტიაში აცხადებენ, რომ მეორე ტურის კამპანიის ფარგლებში განახლდა სალომე ზურაბიშვილის საარჩევნო სლოგანიც. "ერთად საქართველოსთვის" "პრინციპულმა არჩევანმა" ჩაანაცვლა.

ამასთანავე, ფეისბუქით გავრცელდა სალომე ზურაბიშვილის ახალი საარჩევნო კლიპი, რომელშიც მმართველი გუნდის მხოლოდ კაცი ლიდერები მონაწილეობენ. აღნიშნული კლიპი სალომე ზურაბიშვილის არც ერთ ფეიჯზე არ არის განთავსებული და არც გადაზიარებულია.