რობერტ ბეილი 25 წლის განმავლობაში ლოტოს ბილეთების შევსებისას ერთსა და იმავე რიცხვებს იყენებდა და საბოლოოდ გაუმართლა. 67 წლის ნიუ-იორკელმა კაცმა 343,8 მილიონი დოლარი მოიგო.

ნიუ-იორკის ლატარიის ისტორიაში ეს ყველაზე დიდი ჯეკპოტია. თითქმის 30-წლიანი მცდელობის შემდეგ, მომგებიანი რიცხვები ბეილის რიცხვებს დაემთხვა.

იღბლიანმა პენსიონერმა ნაღდი ფულის სახით 125,4 მილიონი დოლარის აღება გადაწყვიტა. მისი სიტყვებით, ის ბილეთებს რეგულარულად 3-4 მაღაზიაში ყიდულობდა, თუმცა იღბლიანი ბილეთის ყიდვისას, წვიმიანი დღე იყო და მის საყიდლად მხოლოდ ერთ ჯიხურში შეიარა.

გამარჯვებულის სიტყვებით, მას ოჯახის წევრმა ეს რიცხვები 25 წლის წინ ურჩია და მას სჯეროდა, რომ ამ რიცხვებით მოგება შეეძლო.

"როდესაც გამარჯვებული რიცხვები გამოცხადდა, ჩემს თავს ვუთხარი: "ეს ჩემს რიცხვებს ჰგავს". ვცდილობდი, რომ სიმშვიდე შემენარჩუნებინა, დავჯექი და გასართობი შოუების ყურება დავიწყე. მთელი ღამე არ მეძინა. მინდა, რომ ამ ფულით რამე კარგი გავაკეთო", - ამბობს ის, თუმცა დასძენს, რომ თამაშისთვის თავის დანებებას არ აპირებს.

რობერტ ბეილი

ლოტოს ჯეკპოტი 687 მილიონი დოლარი იყო, თუმცა გამარჯვებული რიცხვები 51 წლის ქალმაც გამოიცნო. მისი სიტყვებით, თავის დასთან ერთად პიცას და ყავას ყიდულობდა და ხელს ბილეთებიც გააყოლა. მეორე გამარჯვებულმა უკვე იყიდა თავის ცხოვრებაში პირველი სახლი.