სომხეთის ყოფილი პრეზიდენტისა და პრემიერ-მინისტრის, სერჟ სარგსიანის პარტია, რესპუბლიკური პარტია ვადამდელ საპარლამენტო არჩევნებში მიიღებს მონაწილეობას.

აპრილის ხავერდოვანი რევოლუციისა და სარგსიანის გადადგომის შემდეგ რესპუბლიკურმა პარტიამ, ფაქტობრივად, პარლამენტში უმრავლესობა დაკარგა. პარტიის ლიდერების განცხადებით, ისინი არიან ერთადერთი და რეალური ძალა, რომ მთავრობის მთავარი ოპოზიცია გახდნენ.

როგორც რადიო თავისუფლების სომხური გამოცემა წერს, პარტიის საბჭოს სხდომა, რომელსაც სერჟ სარგსიანი ხელმძღვანელობდა, გუშინ, 11 ნოემბერს ჩატარდა.

თავდაცვის ყოფილმა მინისტრმა, ვიგენ სარგსიანმა განაცხადა, რომ სომხეთს რესპუბლიკური პარტია სჭირდება და არჩევნების დღესაც ნიკოლ პაშინიანმა მათ უნდა მისცეს ხმა.

მისივე თქმით, ყოფილი პრეზიდენტი არჩევნებში მონაწილეობას არ მიიღებს და არც საარჩევნო კამპანიაში ჩაერთვება, თუმცა რჩება პარტიის თავმჯდომარედ.

სომხეთში ვადამდელი საპარლამენტო არჩევნები 9 დეკემბერს გაიმართება. პაშინიანი ტაქტიკური მიზეზების გამო 16 ოქტომბერს გადადგა. პაშინიანის გეგმის მიხედვით, პარლამენტმა მომდევნო ორი კვირის განმავლობაში პრემიერი ორივე ჯერზე ვერ აირჩია, რის გამოც, კონსტიტუციის მიხედვით, სომხეთის ეროვნული კრება დაშლილად გამოცხადდა და ქვეყანაში ვადამდელი საპარლამენტო არჩევნები დაინიშნა. პაშინიანს სხვა ფრაქციებთან შეთანხმებული ჰქონდა, რომ არც ერთი არ წარადგენდა პრემიერ-მინისტრობის კანდიდატს.

მიმდინარე წლის მაისში პრემერ-მინისტრად დანიშვნის შემდეგ ნიკოლ პაშინიანი ხშირად ამბობდა, რომ ქვეყანას პოლიტიკური სტაბილურობისთვის ვადამდელი საპარლამენტო არჩევნები სჭირდება.