შინაგან საქმეთა სამინისტრომ ტრანსგენდერი ქალების ცემის საქმეზე სამი პირი დააკავა. უწყებაში აღნიშნავენ, რომ ყველა მათგანმა დანაშაული შეუწყნარებლობის მოტივით ჩაიდინა.

იმის მიუხედავად, რომ შსს-ს ინფორმაციითაც დანაშაული გენდერული იდენტობის მოტივით მოხდა, საქმე არ გადაკვალიფიცირდა. ახლა გამოძიება მხოლოდ სისხლის სამართლის კოდექსის 126-ე მუხლის (ძალადობა) იმ ნაწილებით მიმდინარეობს, სადაც გენდერული მოტივი არაა მითითებული.

"გამოძიებამ დაადგინა, რომ მიმდინარე წლის 12 ნოემბერს, ღამით, თბილისში, თამარ მეფის გამზირზე, ცირკის მიმდებარე ტერიტორიაზე ოთხმა პირმა ორ ტრანსგენდერს, გენდერული იდენტობის ნიშნით შეუწყნარებლობის მოტივით, სიტყვიერი და ფიზიკური შეურაცხყოფა მიაყენა და შემთხვევის ადგილიდან მიიმალა", — აღნიშნულია შინაგან საქმეთა სამინისტროს მიერ გავრცელებულ განცხადებაში.

უწყებაში აცხადებენ, რომ ამ საქმეზე ჩადენილი დანაშაულის გამო კიდევ ერთ პირს ეძებენ.