19 ნოემბერს, თბილისში დაგეგმილ საქართველო-ყაზახეთის მატჩზე ყველა ბილეთი სიმბოლურ ფასად, 1 ლარად გაიყიდება. ამ ფორმით, საქართველოს ფეხბურთის ფედერაცია გულშემატკივრებს მადლობას უხდის მხარდაჭერისთვის.

ფედერაციაში ამბობენ, რომ ნაკრების წარმატება უპირველესად გულშემატკივრებს ეკუთვნით, რადგან ქართული ფეხბურთისა და გუნდისთვის მნიშვნელოვან ეტაპზე მათ განსაკუთრებული როლი ითამაშეს.

ბილეთების გაყიდვა ონლაინ დღეს, 9 ნოემბერს დაიწყება TKT.GE-ზე. ზუსტ დროს ფედერაცია მოგვიანებით გაავრცელებს. სალაროებში კი ბილეთების ყიდვა 12 ნოემბრიდან იქნება შესაძლებელი.

შეგახსენებთ, რომ საქართველოს ნაკრები UEFA-ს ერთა ლიგის ჩემპიონატზე D ლიგის პირველი ჯგუფის გამარჯვებული ფინალამდე გაცილებით ადრე გახდა. ისტორიაში პირველად, საქართველოს ნაკრები ძალიან ახლოსაა ევროპის ჩემპიონატში მონაწილეობის მისაღებად.

საჩუქრის შემდეგ ფეხბურთის ფედერაციამ დასვა კითხვა — ვავსებთ დინამო არენას? 19 ნოემბერს ყველამ ერთად გავცეთ პასუხი.