შინაგან საქმეთა სამინისტრომ მარნეულში ჯგუფურად ჩადენილი ყაჩაღობის ბრალდებით ორი პირი დააკავა. დაკავებულებს ბრალად 80 ათასი ლარის ღირებულების ოქროს სამკაულების გატაცება ედებათ.

უწყების ინფორმაციით, ბრალდებულები მიმდინარე წლის 3 ნოემბერს მარნეულის რაიონის სოფელ ყიზილაჯლოში მოქალაქეებს სახლთან დახვდნენ. გამოძიების ვერსიით, მათ ერთ-ერთი მოქალაქეს ავტომობილის მინა ჩაუმტვრიეს და მუქარით ხელჩანთა გაიტაცეს, რომელშიც სამკაულები იდო. შსს-ს ცნობით, სამართალდამცველებმა სამკაულებისგან გადამდნარი ოქრო და ძვირფასი თვლები ნივთმტკიცებად ამოიღეს.

საქმეზე გამოძიება საქართველოს სისხლის სამართლის კოდექსის 179-ე მუხლის მე-2 ნაწილის "ბ" ქვეპუნქტითა და მე-3 ნაწილის "გ" ქვეპუნქტით მიმდინარეობს. აღნიშნული მუხლის მიხედვით, ჯგუფურად, დიდი ოდენობით ნივთის დაუფლების მიზნით ჩადენილი ყაჩაღობა 8-დან 12 წლამდე ვადით თავისუფლების აღკვეთას ითვალისწინებს.