უკრაინის გენერალური პროკურორი, იური ლუცენკო გადადგა, წერს უკრაინული გამოცემა Unian. ლუცენკოს გადადგომა უკრაინელი აქტივისტისა და ხერსონის მერის მოადგილის, ეკატერინა გაძიუკის საქმეს უკავშირდება.

როგორც გამოცემა წერს, უმაღლესი რადის წინაშე გამოსვლის დროს იური ლუცენკომ "სისხლიანი პიარი" გააკრიტიკა, რომელიც გამოძიების გარშემო აგორდა. აქტივისტის საქმეზე რადაში დროებითი საგამოძიებო კომისია შეიქმნა.

"მე არ მესმის რა უნდა ქნას საგამოძიებო კომისიამ დაუსრულებელ საქმეზე. პროკურორი კომისიის არც ერთ წევრს არ მისცემს საქმის მასალებზე წვდომას... მე ვხვდები, რომ საგამოძიებო კომისიის ორგანიზატორებს არა შედეგი, არამედ ძალაუფლებისთვის ბრძოლისას პიარი სჭირდება", - განაცხადა ლუცენკომ.

მისივე თქმით, იმისათვის, რომ არავის ეგონოს, რომ ვინმე "ძალაუფლებას ეპოტინება", პრეზიდენტს გადადგომით მიმართავს.

მიმდინარე წლის 31 ივლისს ხერსონაში უცნობმა პირმა გოგირდის მჟავა შეასხა ეკატერინა გაძიუკს. ქალს სხეულის 30-პროცენტიანი დამწვრობა მიიღო. პროკურატურამ გამოძიება განსაკუთრებული სისასტიკით განზრახ მკვლელობის მუხლით დაიწყო. საქმეზე ექვსი ბრალდებული დააკავეს, მათგან ერთი გაათავისუფლეს, ხოლო ორს აღკვეთის ღონისძიებად შინაპატიმრობა მიუსაჯეს.

ოთხ ნოემბერს სამთვიანი მკურნალობის შემდეგ ქალი გარდაიცვალა. უფლებადამცველმა ორგანიზაციებმა ღია წერილით მიმართეს ხელისუფლებას და გენერალური პროკურორისა და შინაგან საქმეთა მინისტრის გადადგომა მოითხოვეს.

იური ლუცენკოს გენერალური პროკურორის პოსტი 2016 წლის მაისიდან ეკავა. 2007-2010 წლებში ის შინაგან საქმეთა მინისტრი იყო.

ლუცენკო და სააკაშვილი

უკრაინაში საქართველოს ექს-პრეზიდენტისა და ოდესის ყოფილი გუბერნატორის, მიხეილ სააკაშვილის დაკავებისა და სასამართლოს დროს მთავარი პროკურორი სწორედ იური ლუცენკო იყო.

მიხეილ სააკაშვილი კიევში პირველად 5 დეკემბერს დააკავეს, თუმცა მომხრეებმა ის სპეცრაზმელების ავტომობილიდან დაიხსნეს. მოგვიანებით, ის 9 დეკემბერს ხელმეორედ დააკავეს, პროკურატურამ კი მისთვის ელექტრო სამაჯურის გამოყენებით შინაპატიმრობა მოითხოვა, რაც 11 დეკემბრის სასამართლო სხდომაზე არ დაკმაყოფილდა.

უკრაინის ხელისუფლება ამტკიცებს, რომ სააკაშვილი ქვეყანაში გადატრიალების ორგანიზებას უწყობდა ხელს, რომელსაც ექს-პრეზიდენტი ვიქტორ იანუკოვიჩი და ბიზნესმენი სერგეი კურჩენკო აფინანსებდნენ. საქართველოს მესამე პრეზიდენტი და უკრაინული ოპოზიციური პარტიის ლიდერი ბრალდებებს აბსურდულს უწოდებს. ის უკრაინის მთავრობას პოლიტიკურ დევნაში ადანაშაულებს.