გირჩის საპრეზიდენტო კანდიდატმა, ზურაბ ჯაფარიძემ განაცხადა, რომ ეგზიტპოლების შედეგების მიუხედავად ეს არის გირჩის გამარჯვება.

"ეგზიტპოლებს რაც შეეხება, გასაგებია, რომ ყველა ფლანგი ცდილობს ამ შედეგებით შექმნას წინასწარი განწყობა, რომ რაღაც თვალსაზრისით ისინი არიან გამარჯვებულები", — განაცხადა ჯაფარიძემ.

მისი თქმით, გირჩს უფრო მაღალი შედეგები აქვს ვიდრე ამ ეგზიტპოლებში ჩანდა. მისივე თქმით, ატარებდნენ პარალელურ დათვლას უბნების დაახლოებით 10%-ზე და მათი კვლევის შედეგებს მოგვიანებით გაასაჯაროებენ.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით სალომე ზურაბიშვილმა გაიმარჯვა. მათი თქმით, 28.1 % აქვს გრიგოლ ვაშაძეს და 9.2% დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

მეორე ტური იმართება რუსთავი 2-ის მიერ ჩატარებული ეგზიტპოლის შედეგებითაც. 16:00 საათის შედეგებით სალომე ზურაბიშვილს და გრიგოლ ვაშაძეს 40-40% აქვთ, დავით ბაქრაძეს კი — 10%. რუსთავი 2-ისთვის კვლევა გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია, გამოკითხვა 115 უბანზე ჩატარდა.