დღეს, 26 ოქტომბერს, რუსთაველის გამზირზე, პარლამენტთან მიმდინარე აქციის დროს მალხაზ მაჩალიკაშვილმა ზაზა სარალიძის ინციდენტი ხალხის ნაკლებობას დააბრალა. On.ge-სთან საუბრისას, მან თქვა, რომ სარალიძის მხარდასაჭერად აქციები მის გარეშეც გაგრძელდება:

"ხალხი რომ გამოსულიყო, თუნდაც 1 000 ადამიანი, იმ კარავს დავდგამდით. ჩვენ ისედაც მწყობრიდან ვართ გამოსული და კბილებით გვიჭირავს ნერვები. მათ ეს იციან და ყოველთვის ცდილობენ ჩვენს წამოგებას. დღეს ეს მოახერხეს. ჩვენ ვეცდებით ყველანაირად, მთელი საქართველო გამოვიყვანოთ".

ამ წუთებში რუსთაველის გამზირზე ხორავას ქუჩაზე მოკლული მოზარდის მამის, ზაზა სარალიძის მხარდასაჭერი აქცია მიმდინარეობს სლოგანით, "იმოქმედე სიმართლისთვის". სარალიძე დღეს, 26 ოქტომბრის დილას, კარვის გაშლის გამო პოლიციელზე თავდასხმის ბრალდებით დააკავეს. აქციაზე შეკრებილმა აქტივისტებმა პარლამენტის შენობის წინ პერფორმანსის გასამართად კარავი მიიტანეს. ორგანიზატორები აცხადებენ, რომ კარვის გაშლა არის თავისუფალი მანიფესტაციის ფორმა და მიიჩნევენ, რომ ზაზა სარალიძეს ეს უფლება არ უნდა შეუზღუდონ.

აქციას შეუერთდნენ პარტია გირჩისა და ევროპული საქართველოს წევრები. ასევე, ზაზა სარალიძეს აქციაზე მხარდაჭერას უცხადებენ თეთრი ხმაურის მოძრაობის წარმომადგენლებიც.

შინაგან საქმეთა სამინისტროს ინფორმაციით, ზაზა სარალიძე და მასთან ერთად კიდევ ორი პირი პოლიციელზე თავდასხმის ბრალდებით დააკავეს.

ზაზა სარალიძემ სამართალდამცავების მიმართ აგრესია მას შემდეგ გამოხატა, რაც მას თბილისში, პარლამენტის შენობასთან კარვის გაშლის უფლება არ მისცეს. ეს პირველი შემთხვევა არაა, როცა მას ეს უფლება შეუზღუდეს.