პარტია ქართული ოცნების თავმჯდომარე ბიძინა ივანიშვილი იზიარებს საქართველოს პარლამენტის თავმჯდომარის, ირაკლი კობახიძის აზრს და ამბობს, რომ "სუსტი მამაკაცები ებრძვიან ძლიერ ქალბატონს".

ივანიშვილის განცხადებით, პარტიის შიდა კვლევები აჩვენებს, რომ მეორე ტურის დანიშვნის შესაძლებლობა მინიმალურია. იმ შემთხვევაში, თუ მეორე ტური იქნება, სალომე ზურაბიშვილის კონკურენტი ან გაერთიანებული ოპოზიციის კანდიდატი, გრიგოლ ბაქრაძე ან ევროპული საქართველოს კანდიდატი, დავით ბაქრაძე იქნება.

"თუ ქართული ოცნების ამომრჩევლის მაქსიმალური მობილიზება იქნება, სალომე პირველივე ტურში აიღებს საკმარის ხმებს. მეორე ტური თუ შედგა, რომლის მცირე ალბათობაც არსებობს, თითქმის თანაბარი შანსი აქვს ნაციონალური მოძრაობის ორ წარმომადგენელს, ბაქრაძესა და ვაშაძეს", — განაცხადა ბიძინა ივანიშვილმა.

ქართული ოცნების მიერ გამოქვეყნებული შიდა კვლევის მიხედვით, არჩევნებში მათ მიერ მხარდაჭერილი კანდიდატი სალომე ზურაბიშვილი იმარჯვებს. 2018 წლის საპრეზიდენტო არჩევნები 28 ოქტომბერს გაიმართება. ეს ბოლო არჩევნებია, რომლის დროსაც პრეზიდენტის ამომრჩეველი ხალხი იქნება. 2020 წლიდან პრეზიდენტს 300 ხმოსანი აირჩევს.