რუსეთის დუმის დეპუტატმა, ვიტალი მილონოვმა პეტერბურგში ლგბტ კინოფესტივალის Side by Side-ის გახსნა ჩაშალა, წერს რადიო თავისუფლების რუსული ბიურო.

დეპუტატი კინოთეატრთან მივიდა და მაყურებელს დარბაზში არ უშვებდა. როგორც აქტივისტები ყვებიან მილონოვი ჰომოფობიურ სიტყვებს გაჰყვიროდა: "მოქალაქე ჰომოსექსუალებო და გარყვნილებო! გთხოვთ დატოვოთ აღნიშნული ღონისძიება!" ის, ასევე, ცდილობდა, რომ იქ შეკრებილები არასანქცირებული მიტინგის მოწყობაში დაედანაშაულებინა.

როგორც რადიო თავისუფლება წერს, დეპუტატმა პოლიციელებს შეატყობინა, რომ კინოთეატრში თითქოსდა მძევლები ჰყავთ აყვანილი. მილონოვის პრესმდივანმა განმარტა, რომ ის საზოგადოებრივ ინსპექციას ატარებდა რა დროსაც შენიშნა, რომ არასრულწლოვნებში ლგბტ პროპაგანდას ეწეოდნენ და ამის შესახებ პოლიციას მიმართა. რუსეთის კანონმდებლობით, არასრულწლოვნებს შორის ლგბტ პროპაგანდა აკრძალულია.

"პოლიციამ ყველა გარეთ გამოიყვანა. ღონისძიების გახსნა ჩაიშალა. ჩვენი შეხედულებით, ეს კარგი ტრადიციაა", - განაცხადა პრესმდივანმა.

ვიტალი მილონოვი 2016 წელსაც ცდილობდა რუსული საერთაშორისო კინოფესტივალის Side by Side-ის ჩაშლას.

ფესტივალის ორგანიზატორებმა განაცხადეს, რომ ყველა დაგეგმილი კინოჩვენება განრიგის მიხედვით ჩატარდება. მათ არ გამორიცხეს, რომ პროვოკაციისთვის სასამართლოს მიმართავენ.