"შვილებს გეფიცებით თუ ვკეკლუცობდე", — ქართული ოცნების თავმჯდომარესა და ყოფილ პრემიერ-მინისტრს, ბიძინა ივანიშვილს 2016 წელს ფარული ჩანაწერების გავრცელება არ ახსოვს.

ორი წლის წინ პირადი ცხოვრების ამსახველი ფარული ვიდეოჩანაწერების გავრცელების შესახებ ივანიშვილს კითხვა ეკა კვესიტაძემ დაუსვა. ჟურნალისტებმა რამდენჯერმე განუმარტეს ვუდეოჩანაწერების შინაარსი და მათი მნიშვნელობა, თუმცა ივანიშვილმა მაინც ვერ გაიხსენა რომელ ჩანაწერებზე იყო საუბარი.

კვესიტაძე: პირადი ცხოვრების ამსახველი ფარული ვიდეოჩანაწერები აღარ გახსოვსთ ბატონო ბიძინა?

ივანიშვილი: 2016 წელს?

კვესიტაძე: 2016 წელს, ინგა გრიგოლიას რომ ემუქრებოდნენ და მუდმივი ფსიქოლოგიური ზეწოლის ქვეშ იყო ფარული ჩანაწერების გამო...

ივანიშვილი: ვერ ვიხსენებ, გეფიცებით, ვერ ვიხსენებ, რაზეა საუბარი

კვესიტაძე: მართლა ვერ იხსენებთ? ეტყობა, პროკურატურასაც დაავიწყდა...

2016 წლის 11 მარტს გავრცელდა, სავარაუდოდ, ერთ-ერთი პოლიტიკოსის პირადი ცხოვრების ამსახველი ფარული აუდიოჩანაწერი. 14 მარტს კიდევ ერთი ვიდეო გავრცელდა, რომელიც, პირადი ცხოვრების ამსახველ კადრებთან ერთად, შეიცავდა მუქარას და შანტაჟს კონკრეტული პოლიტიკოსებისა და ჟურნალისტისადმი, რომ თუ ისინი 31 მარტამდე არ დატოვებდნენ თანამდებობებს, მათი პირადი ცხოვრების ამსახველი ჩანაწერების გასაჯაროებაც მოხდებოდა. 15 მარტს გავრცელებული ინფორმაციით, მთავარმა პროკურატურამ ინტერნეტში გავრცელებულ ფარულ ჩანაწერებთან დაკავშირებით ორი პირი დააკავა.

ვიდეობის გავრცელებასთან დაკავშირებით პროკურატურამ გამოძიება სისხლის სამართლის კოდექსის 157-ე მხულის მეორე ნაწილით დაიწყო, რაც გულისხმობს პირადი, ან ოჯახური საიდუმლოს ხელყოფა, პირადი ან ოჯახური საიდუმლოს უკანონოდ გამოყენება ანდა გავრცელება ამა თუ იმ ხერხით. დღემდე უცნობია თუ რა ეტაპზეა გამოძიება და მისი შედეგები.