ბარბის მწარმოებელი კომპანია Mattel გენდერულ სტერეოტიპებს დაუპირისპირდება. ამის შესახებ, პოპულარული თოჯინის იუთუბზე ახალი რეკლამა გამოჩნდა.

"უამრავ გოგოს საკუთარ შესაძლებლობებში ეჭვი 5 წლის ასაკიდან ეპარება. მათ აღარ სჯერათ, რომ საკუთარი სქესის გამო ყველაფრის გაკეთებას შეძლებენ. ესაა სხვაობა ოცნებებში და 2018 წლიდან Barbie მის წინააღმდეგ იწყებს ბრძოლას", - ვკითხულობთ ვიდეოს აღწერაში.

რეკლამაში პატარა გოგოები მონაწილეობენ, რომლებიც საზოგადოებას მოუწოდებენ, რომ მათ მიმართ დამოკიდებულება შეცვალონ:

"5 წლიდან გოგოებს აღარ სჯერათ, რომ შეუძლიათ გახდნენ მეცნიერები, პრეზიდენტები, მოაზროვნეები, ინჟინრები, ასტრონვტები. რატომ? იმიტომ, რომ ჩვენ არავინ გვჩუქნის მეცნიერებასთან დაკავშირებულ სათამაშოებს. ჩვენი მშობლები კი ფიქრობენ, რომ ბიჭები უფრო ნიჭიერები არიან. გვინდა საოცარი ქალების ნახვა და იმის გაგება, როგორ მიაღწიეს მათ წარმატებას, ეს დაგვეხმარება იმის წარმოდგენაში, რომ ჩვენც შეგვიძლია. თუმცა ამას მარტო ვერ შევძლებთ. ჩვენ ყველა თქვენგანის დახმარება გვჭირდება, რომ დავასრულოთ არათანაბარი ოცნებების ეპოქა".

2018 წლის გაზაფხულზე ბარბიმ 17 ცნობილი ქალის ინსპირაციით კოლექცია შექმნა.