საქართველოს პარლამენტის დეპუტატის ქართული ოცნებიდან, ვიქტორ ჯაფარიძის ცოლმა, ნათია ხვისტანმა მმართველი გუნდის მიერ მხარდაჭერილ კანდიდატს, სალომე ზურაბიშვილს 50 ათასი ლარი გადაურიცხა. დეპუტატის ცოლმა 2017 წელს 55 ათასი ლარი ქართულ ოცნებას შესწირა

თვითონ დეპუტატს ქართული ოცნებისთვის 2012 წლის შემდეგ 120 ათასი ლარი აქვს შეწირული.

ვიქტორ ჯაფარიძე და ხორავას ქუჩის საქმეზე დანაშაულის შეუტყობინებლობისთვის დაკავებული, მირზა სუბელიანი რუსთავი 2-ის მიერ გავრცელებულ იმ აუდიოჩანაწერებში ფიგურირებს, რომელთან ავთენტურობა ჯერ დადგენილი არ არის. აუდიოჩანაწერში საუბარია გახმაურებული საქმეების გახსნის ძალადობრივ მეთოდებზე, ხელისუფლების კომპრომატებზე, ხორავას ქუჩის საქმეზე და სავარაუდოდ, ყოფილი პრემიერის, ვანო მერაბიშვილის ციხიდან გაყვანის ეპიზოდზე.

On.ge-ს მიერ გამოთხოვილი ინფორმაციის შესაბამისად, ვიქტორ ჯაფარიძე მირზა სუბელიანთან ციხეში იმ დღეს შევიდა, როცა რუსთავი 2-მა მათი აუდიოჩანაწერის P.S.-ში გასვლა დააანონსა. ჩანაწერის სრული ვერსია იმავე საღამოს, კვირას, 14 ოქტომბერს გავიდა ეთერში.

ხორავას ქუჩის საქმეზე, დანაშაულის შეუტყობინებლობისთვის ბრალდებულ სუბელიანს ჯაფარიძე შაბათს, 6 ივლისს, 20 ივლისს, 10 სექტემბერსა და 11 ოქტომბერს შეხვდა.

ხუთივე ბრძანებაში, რომელსაც პარლამენტის თავმჯდომარე, ირაკლი კობახიძე აწერს ხელს, შესვლის მიზეზად მითითებულია, ბრალდებულ მირზა სუბელიანის მონახულება, მისი პრობლემისა და მდგომარეობის მონიტორინგი.

ამავე თემაზე: