სამშენებლო კომპანია არქის ხუთი პროექტის დირექტორმა და ამავდროულად, ორი კომპანიის მეწილემ, თენგიზ წულაიამ ხელისუფლებისგან მხარდაჭერილ კანდიდატს, სალომე ზურაბიშვილს 60 000 ლარი შეწირა. ამ დრომდე პრეზიდენტობის ამ კანდიდატს არქის სხვადასხვა პროექტის მეწილეებმა ჯამში 300 000 ლარი გადაურიცხეს.

თენგიზ წულაია ერთდროულად არის შპს არქი მენეჯმენტის, შპს არქი დეველოპმენტის, შპს არქი საბურთალოს, შპს არქი პრომოუშენის, შპს არქი დიღომისა და შპს არქი გლდანი 3-ის დირექტორი და შპს პრაიმ არქისა და შპს არქი ვარკეთილის მეწილე.

თენგიზ წულაია პარლამენტში ქართული ოცნების დეპუტატის, ივლიანე წულაიას ბიზნესპარტნიორია. გარდა ამისა, შპს არქის დირექტორი წლების განმავლობაში ივლიანე წულაია იყო. ის ამ დრომდე რჩება არქის კომპანიების: შპს არქი დეველოპმენტის, შპს არქი თაუერის, შპს არქი ენერჯის, შპს არქი ჰოთელსის, შპს პრაიმ არქის, შპს არქი საბურთალოსა და შპს არქი ინვესთმენთსის წილების მფლობელი.

ივლიანე წულაიამ სალომე ზურაბიშვილს 60 ათასი ლარი სექტემბერში გადაურიცხა, ამდენივე თანხა შეწირეს სამშენებლო კომპანია შპს არქის მფლობელმა და დირექტორმა ირაკლი ქაფიანიძემ, შპს არქი ვარკეთილის მეწილემ და დირექტორმა დიმიტრი ადამიამ და შპს არქი გლდანის მეწილემ და დირექტორმა კახაბერ კობაივანოვმა.

ივლიანე წულაიამ On.ge-სთან ამ საკითხზე საუბარი არ ისურვა, თენგიზ წულაია კი ამბობს, რომ ქართულ ოცნებას უჭერს მხარს და ამ მიზეზით გადაურიცხა სალომე ზურაბიშვილის 60 ათასი ლარი. მან არ დაასახელა სალომე ზურაბიშვილის რომელ ღირებულებებს იზიარებს.

ზურაბიშვილის მსხვილი შემწირველები და საზოგადოების პროტესტი

სექტემბერში სალომე ზურაბიშვილს 50 000 ლარი შეწირა კოკა-კოლას დირექტორმა და ლაღიძის წყლის მეწილემ ვახტანგ ლაღიძემაც. მას შემდეგ, რაც აღნიშნული ინფორმაცია საჯარო გახდა, მომხმარებლების ნაწილმა კოკა-კოლისა და ლაღიძის წყლის ფეისბუქგვერდებზე ფლეშმობი დაიწყო. ფეისბუქგვერდებზე კომენტარებსა და შეფასებებში იდენტური შინაარსის ტექსტები: "რუსეთის გეგმის დამფინანსებელი! #რუსეთიოკუპანტია #არაოკუპაციას #Russiaisoccupant #Russiaisoccupier" იწერებოდა.