მმართველი პარტიის მხარდაჭერილმა კანდიდატმა, სალომე ზურაბიშვილმა ჟურნალისტებს მორიგი შენიშნა მისცა. კანდიდატმა განაცხადა, რომ ჟურნალისტები უფრო მეტ ყურადღებას აქცევენ მის წინააღმდეგ გამართული საპროტესტო აქციების გაშუქებას, ვიდრე მის კამპანიას.

ზურაბიშვილმა ჟურნალისტებს განუმარტა, რომ მათი მოვალეობაა გააშუქონ მის დაპირებები, პროგრამა და არა "ვითომ დაძაბულობა".

"ტელევიზიები რატომღაც აქცევენ ამას მეტ ყურადღებას, ვიდრე ჩემს გამოსვლებს და ვიდრე იმას, რაც უნდა იყოს გადამწყვეტელი ამომრჩევლისთვის, ანუ გაიგოს, მე რას ვთავაზობ. ის, რომ ორი კაცი ყვირის გარეთ არ არის გადამწყვეტი არჩევნებისთვის", — აღნიშნა ზურაბიშვილმა.

დღეს, 9 ოქტომბერს სალომე ზურაბიშვილი გარდაბანში ამომრჩეველს ხვდებოდა, რის პარალელურად კიდევ ერთი საპროტესტო აქცია გაიმართა. კანდიდატმა სწორედ ამ აქციის გაშუქებაზე ისაუბრა.

ზურაბიშვილმა 5 ოქტომბერს აღნიშნა, რომ საქარველოში მედია და არასამთავრობო ორგანიზაციები მოწოდების სიმაღლეზე ვერ დგას და ეს აუცილებლად უნდა გამოსწორდეს. მისი თქმით, ეს ორი საკითხი სახელმწიფოს მშენებლობის ბერკეტია და ისინი გამართულად უნდა ფუნქციონირებდნენ. მისივე თქმით, არ გულისხმობს რომელიმეს შეზღუდვაზე, მაგრამ "ღირსება ორივესგან მოსათხოვი არის და მოეთხოვებათ".

საპრეზიდენტო კამპანიის დასაწყისში, 15 აგვისტოს ჟურნალისტებმა სალომე ზურაბიშვილს პრეზიდენტის რეზიდენციასთან დაკავშირებით კითხვა დაუსვეს. რადგან ამ საკითხზე ტელეკომპანია იმედის ეთერში უკვე ჰქონდა კომენტარი გაკეთებული, ზურაბიშვილმა ჟურნალისტს ასე უპასუხა: "უკვე არის ნათქვამი და ცოტა ჟურნალისტებმაც ტვინი გაანძრიეთ და ჩაიხედეთ სად არის ნათქვამი". მოგვიანებით, კანდიდატმა ნათქვამს ხუმრობა უწოდა და ბოდიში მოიხადა.