ჩვენს ტერფზე მორგებული ფეხსაცმლის საყიდლად მხოლოდ მისი ზომის ცოდნა საკმარისი არაა. მეტიც — მის სწორად შერჩევაზეა დამოკიდებული თქვენი ფეხის ჯანმრთელობა.

პირველ რიგში, გადაავლეთ თვალი თქვენი ფეხსაცმლის კოლექციას. ამოარჩიეთ ის ფეხსაცმელი, რომელიც ყველაზე არაკომფორტულია ან ფეხს გტკენთ და ეცადეთ ის პრობლემა იპოვოთ, რომელიც ახალი ფეხსაცმლის შეძენისას გაითვალისწინებთ.

თუმცა როგორ უნდა ვიპოვოთ "ის ერთადერთი", რომელიც კარგადაც მოგვერგება, ჩვენს გემოვნებაშიც ჩაჯდება და თავის მოვალეობასაც შეასრულებს?

ამ კითხვაზე პასუხის გასაცემად ჰარვარდის სამედიცინო სკოლა რვა რჩევას გვიზიარებს.

1. ფეხსაცმლის შესაძენად საღამომდე მოიცადეთ, რადგან დღის განმავლობაში ფეხი მოძრაობისას ან სიცხეში ყოფნისას ბუნებრივად ფართოვდება. ასე უფრო დიდი სიზუსტით შეარჩევთ ყოველდღიურ და კომფორტულ ნივთს;
2. საყიდლებზე წასვლამდე ის წინდა ჩაიცვით, რომელსაც წინასწარ განიხილავთ ახალი ფეხსაცმლისთვის;
3. თუ თქვენთვის ფეხსაცმლის შეძენას სხვა ადამიანს ანდობთ, ამ გარემოების გათვალისწინება განსაკუთრებით დაგეხმარებათ: გაზომეთ თქვენი ორივე ტერფი, სიგრძესა და სიგანეში. თუ რომელიმე წინაზე ფართო ან გრძელია, იმ ზომის ფეხსაცმელი დააბარეთ, რომელიც შედარებით დიდი ზომის ფეხზე მოგერგებათ;
4. როდესაც ფეხსაცმელს ყიდვამდე მოისინჯავთ, ფეხზე წამოდექით. დარწმუნდით, რომ ფეხის ყველაზე გრძელ თითსა და ფეხსაცლის წვერს შორის ნახევარი ან ერთი სანტიმეტრის სიგრძის სივრცე მაინც არის დარჩენილი;
5. გაიარეთ და დააკვირდით, როგორ გრძნობთ თავს თქვენ და თქვენი ტერფები. არის ის კომფორტული და სეზონის შესაბამისად თბილი/გრილი? მყარად დგახართ ქუსლებზე, თუ წონასწორობის შეკავება გიჭირთ? ასევე აუცილებელია, რომ ტერფის ძირზე რბილი ქსოვილი თავისუფლებას გრძნობდეს. ფეხსაცმელს ნუ მოსთხოვთ, რომ "ხმარებისას გაიწიოს" და ნურც იმას იფიქრებთ, რომ მის მოსარგებად მოძრაობისას ცხვირთან მისი ძალდატანებით გადაკეცვა აუცილებელია;
6. შეძენისას ყველაზე მეტად თქვენს კომფორტზე იფიქრეთ და არა ფეხსაცმელზე მითითებულ ზომასა და აღწერაზე. სხვადასხვა მწარმოებლების მიერ მითითებული ზომები შესაძლოა არ ემთხვეოდეს ერთმანეთს და როგორი დამაჯერებელიც არ უნდა იყოს რეკლამა, მთავარი შემფასებელი თქვენ და თქვენი ფეხები ხართ;
7. შეამოწმეთ ფეხსაცმლის შიგნით არსებული მატერია და დარწმუნდით, რომ ქსოვილი ან შიგნით არსებული მარკა თქვენს ფეხს არ გააღიზიანებს;
8. გადმოაბრუნეთ ფეხსაცმელი და კარგად შეისწავლეთ მისი ძირი. არის ის საკმარისად ძლიერი იმისთვის, რომ ბასრი საგნებისგან დაგიცვათ? არის ის საკმარისად მოქნილი, რბილი და მსუბუქი? ძირი ფეხსაცმლის მოზომვის შემდეგაც შეამოწმეთ.

გაითვალისწინეთ ისიც, რომ თუ თქვენი შიშველი ფეხის ტერფს ქაღალდზე კონტურს შემოავლებთ, თქვენი ყველაზე კომფორტული ფეხსაცმლის ზომა მას იდეალურად დაემთხვევა.

ფეხსაცმლის არასწორად შერჩევა დისკომფორტთან ერთად ისეთ დაავადებებსაც იწვევს, როგორიცაა მაგალითად პოდაგრა. მასზე სამკურნალოდ რჩევებს რუსთავი 2-ის გადაცემა სხვა შუადღეში მოისმენთ.