ბარათაშვილის ქუჩაზე მდებარე სახელმწიფო ელექტროსისტემის შენობის გარე ფასადის მინები გაბზარულია. ეს ის შენობაა, რომლიდანაც შუშის ჩამოვარდნის შედეგად 2018 წლის თებერვალში ქვეითად მოსიარულე 6 ბავშვი დაშავდა, რომელთაგანაც ერთ-ერთი გარდაიცვალა.

საქართველოს სახელმწიფო ელექტროსისტემის განცხადებით, დღეს, 8 ოქტომბერს კომპანიის თანამშრომლებს გარე ფასადის ორი მინა დაზიანებული დახვდათ. უწყებაში წერენ, რომ შემთხვევის შედეგად არავინ დაშავებულა. მათივე თქმით, უსაფრთხოების მიზნით, მიმდებარე პერიმეტრი შემოიღობა სპეციალური ლენტით.

როგორც შსს-მ On.ge-ს განუცხადა, გაბზარულ მინას ამჟამად ცვლიან. უწყების ცნობით, საქმეზე გამოძიება საქართველოს სისხლის სამართლის კოდექსის 187-ე, ნივთის დაზიანების ან განადგურების მუხლითაა დაწყებული.