საქართველოს მთავარ პროკურატურაში ფონდ იავნანას დამფუძნებლის, პაატა ბურჭულაძის მეუღლე ანგელა ვასილენკო დაკითხვაზე დაიბარეს. ამის შესახებ პროკურატურამ საგანგებო გაცხადება გაავრცელა. უწყების ცნობით, ვასილენკოს დაკითხვა საქველმოქმედო ფონდ იავნანას ხელმძღვანელ პირთა მიერ ფონდის თანხების შესაძლო მითვისება-გაფლანგვის საქმეს უკავშირდება.

პროკურატურაში აცხადებენ, რომ ამ ეტაპზე გამოძიება სამ ძირითად მიმართულებას სწავლობს. პირველი ეპიზოდი პაატა ბურჭულაძისა და მისი მეუღლის ანგელა ვასილენკოს მგზავრობის ხარჯების ფონდის კუთვნილი თანხებიდან ანაზღაურებას უკავშირდება.

"მათი მგზავრობის ხარჯებისთვის ფონდმა დახარჯა 700 000 ლარამდე, იმ პირობებში, როდესაც დაუდგენელია პაატა ბურჭულაძის მეუღლის როლი ფონდის საქმიანობაში", — ნათქვამია უწყების განცხადებაში.

პროკურატურის ცნობით, იავნანას საქმეში მეორე ეპიზოდი ეხება ბრალდებას, სადაც საქართველოში პაატა ბურჭულაძის სასარგებლოდ, სავარაუდოდ, სასტუმრო მომსახურების ხარჯები გასწიეს.

"დაუსაბუთებელია, ფონდის სახსრებიდან რატომ უნდა დახარჯულიყო პაატა ბურჭულაძის სასტუმროს მომსახურების დასაფარად დაახლოებით 40 000 ლარი. გაუგებარია და გარკვეულ ეჭვებს აჩენს ფონდის რომელ მიზანს ემსახურებოდა ბურჭულაძის ცხოვრება თუ სხვა სახის მომსახურება სასტუმროში, მითუმეტეს, რომ მას საქართველოში გააჩნია საცხოვრებელი ფართები, ხოლო ფონდს - კეთილმოწყობილი ოფისი, სადაც შესაძლებელი იყო შეხვედრების გამართვა და მოლაპარაკებების წარმოება", — ვკითხულობთ პროკურატურის განცხადებაში.

ამასთან, გამოძიება მიმდინარეობს ფონდის საკუთრებაში არსებული უძრავი ქონების იჯარით გაცემის ეპიზოდზე. პროკურატურის პოზიციით, აღნიშნული უძრავი ქონება სახელმწიფოსგან ფონდს გადაეცა სიმბოლურ ფასად, რათა ამ უკანასკნელს ქონება გამოეყენებინა ფონდის მიზნებისათვის.

პროკურატურაში აცხადებენ, რომ ფონდმა ერთ-ერთ საწარმოს იჯარით გადასცა ხსენებული უძრავი ქონება, სადაც წლების განმავლობაში ფუნქციონირებდა რესტორანი, იჯარიდან მიღებული შემოსავალი კი უნდა გამოეყენებინა ფონდის საქველმოქმედო მიზნებისათვის.

"მიუხედავად იმისა, რომ საწარმო და მისი ქვემოიჯარე საკმაოდ რენტაბელურ საწარმოებს წარმოადგენდნენ, ისინი დაახლოებით 6 წლის განმავლობაში ჯეროვნად არ ასრულებდნენ დაკისრებულ ვალდებულებებს - ფონდს სრულად არ უხდიდნენ იჯარის თანხას, თუმცა მიუხედავად ამისა, ხელშეკრულება საწარმოსთან არ შეწყვეტილა, უფრო მეტიც, საწარმოს მიეცა საქმიანობის გაგრძელების შესაძლებლობა", — ამბობენ უწყებაში.

გამოძიების ინფორმაციით, ფონდმა ვერ მიიღო ნახევარ მილიონზე მეტი ლარი, რომელიც უნდა მოხმარებოდა უდედმამო და მზრუნველობა მოკლებულ ბავშვებსა და ფონდის სხვა მიზნებს.

"ამ დროისათვის, გამოძიების მიერ ფონდის საქმიანობასთან დაკავშირებით მოპოვებული დოკუმენტაციის ანალიზი ცხადყოფს, რომ საქველმოქმედო ფონდში 2004-2017 წლებში მოზიდული შემოწირულობების დაახლოებით მხოლოდ 30 პროცენტი ხმარდებოდა ქველმოქმედებას, ხოლო დანარჩენი თანხები ხმარდებოდა თანამშრომელთა ანაზღაურებასა და სხვა ადმინისტრაციულ ხარჯებს", — აცხადებენ პროკურატურაში.

საგამოძიებო უწყების მიერ გავრცელებულ განცხადებაში ნათქვამია, რომ ფონდის თანხების შესაძლო არამიზნობრივ ხარჯვასთან დაკავშირებით საგამოძიებო უწყებას კონკრეტული კითხვები აქვს ბურჭულაძის მეუღლესთან.

ფონდ იავნანას საქმე

საქართველოს მთავარმა პროკურატურამ ფონდ იავნანას ხელმძღვანელი პირების მიერ, სამსახურებრივი მდგომარეობის გამოყენებით, დიდი ოდენობით თანხების შესაძლო მითვისება-გაფლანგვის ფაქტზე გამოძიება სექტემბერში დაიწყო.

გამოძიებას საფუძვლად დაედო არასამთავრობო ორგანიზაცია ახალგაზრდა ფინანსისტთა და ბიზნესმენთა ასოციაციის ვიცე-პრეზიდენტის განცხადება, რომლის თქმითაც, ფონდ იავნანას ხელმძღვანელები შესაძლოა საქველმოქმედო მიზნებისათვის მოპოვებულ თანხებს ითვისებდნენ და არამიზნობრივად ხარჯავდნენ.

ამავე თემაზე: