საფრანგეთში, პარიზის ჩრდილოეთით, ქალაქ შანტიიში მდებარე კაფეში ჩვეულებრივი მზიანი დღე იყო და მომხმარებლები სასიამოვნოდ ატარებდნენ დილას.

თუმცა იგივე ქალაქში მყოფმა დოღის ცხენმა თავლას და საწვრთნელ მინდორს თავი დააღწია და ქალაქში ჰარმონიული სიტუაციის დარღვევა გადაწყვიტა — ციცქნა კაფეში შეირბინა და დიდი ქაოსი გამოიწვია.

სიტუაციის ამსახველი ვიდეო კაფეში არსებულმა კამერამ გადაიღო.

კადრებში ჩანს, როგორ ქმნის ქაოსს მოუსვენარი ცხენი, რომელიც კაფეში შევარდა, მაგრამ გასასვლელს ვერ პოულობს და როგორ დარბიან შეშინებული ადამიანები აქეთ-იქით.

როგორც ადგილობრივი გაზეთი თვითმხილველებზე დაყრდნობით წერს, კაფის კარი ოდნავ იყო შეღებული. მომხმარებლების თქმით, მათ დაინახეს, რომ კარში ცხენმა თავი შეყო, თუმცა ვერც კი წარმოიდგენდნენ, რომ ის კაფეში შევარდებოდა.

შემთხვევის შედეგად არვინ დაშავებულა. როგორც კაფის მეპატრონე ამბობს, ცხენმა სირბილის დროს მაგიდები და სკამები დაამტვრია. უცნობია, აანაზღაურებს თუ არა ცხენის მეპატრონე ზარალს. ბოლო ცნობებით, ცხოველი თავლაში დააბრუნეს.