საქართველოს ჯანდაცვის სამინისტრომ მძიმე, მავნე და საშიშპირობებიან სამუშაოებზე რეგისტრაცია 30 ოქტომბრამდე გადაავადა. აღნიშნული გადაწყვეტილება სამინისტრომ მას შემდეგ მიიღო, რაც იუსტიციის სახლში რიგები დადგა და მომხმარებელთა რეკორდული რაოდენობა დაფიქსირდა.

"შრომის უსაფრთხოების შესახებ" საქართველოს კანონის თანახმად, ყოველი პირი, რომელიც ახორციელებს საქართველოს მთავრობის დადგენილებით განსაზღვრულ მომეტებული საფრთხის შემცველ მძიმე, მავნე და საშიშპირობებიან სამუშაოებს ვალდებულია საქართველოს კანონმდებლობით დადგენილი წესით განახორციელოს შესაბამისი საქმიანობის ეკონომიკურ საქმიანობათა რეესტრში რეგისტრაცია.

ეკონომიკურ საქმიანობათა რეესტრში საქმიანობის რეგისტრაცია შესაძლებელია იუსტიციის სახლებში, საჯარო რეესტრის ტერიტორიულ სარეგისტრაციო სამსახურებში და საზოგადოებრივ ცენტრებში.

საქართველოს მთავრობის 2018 წლის 27 ივლისის #381 დადგენილებით დამტკიცებული მომეტებული საფრთხის შემცველი, მძიმე, მავნე და საშიშპირობებიანი სამუშაოების ჩამონათვალი იხილეთ აქ.

თბილისის იუსტიციის სახლში, ორი კონკრეტული სერვისის გამო, რომელთა გაცემის ვადა პირველ ოქტომბრამდე იწურება, მომხმარებელთა რეკორდული რაოდენობაა. იუსტიციის სახლის განცხადებით, დაწესებულება ყველაფერს აკეთებს, რომ მომხმარებლის ნაკადი მართოს, თუმცა რეკორდული რაოდენობის გამო, მომსახურების დრო საგრძნობლად გაზრდილია.

სერვისები, რომლებმაც იუსტიციის სახლში რიგები და ხალხის რეკორდული რაოდენობა გამოიწვია, ტაქსით მომსახურების ლიცენზია და მძიმე, მავნე და საშიშპირობებიანი სამუშაოების განმახორციელებელ პირთა საქმიანობის რეგისტრაციაა.