თბილისის საქალაქო სასამართლომ ბაგა-ბაღის მეორე სართულიდან ბავშვის გადავარდნის გამო ბაღის აღმზრდელი და მისი თანაშემწე დამნაშავედ ცნო. სასჯელის სახედ და ზომად თითოეულს 3 წლით პირობითი მსჯავრი განესაზღვრა.

ინციდენტი თბილისში, ზემო ფონიჭალის ბაგა-ბაღში 2017 წლის 25 სექტემბერს მოხდა. პროკურატურის განმარტებით, აღმზრდელმა და მისმა თანაშემწემ სამსახურებრივი მოვალეობა არაჯეროვნად შეასრულეს. მათივე თქმით, უმეთვალყურეოდ დატოვებული ბავშვი ღია ფანჯარასთან მივიდა და მეორე სართულიდან გადავარდა. მცირეწლოვანმა სიცოცხლისთვის სახიფათო მძიმე ხარისხის დაზიანება მიიღო.

აღმზრდელსა და მის თანაშემწეს ბრალდება სისხლის სამართლის კოდექსის 220 პრიმა მუხლის მეორე ნაწილით წარედგინათ. ეს მუხლი გულისხმობს გულგრილობას, ესე იგი ორგანიზაციაში სპეციალური უფლებამოსილების მქონე პირის მიერ თავის სამსახურებრივი მოვალეობის არაჯეროვნად შესრულებას, მისდამი დაუდევარი დამოკიდებულების გამო, რამაც გამოიწვია სხვა მძიმე შედეგი.