თეთრი ხმაურის მოძრაობა სამტრედიაში, 22 წლის ბიჭის თვითმკვლელობასთან დაკავშირებით განცხადებას ავრცელებს, სადაც ნათქვამია, რომ მოქმედი ნარკოპოლიტიკა მიზანმიმართულად უტევს საზოგადოების ყველაზე მოწყვლად ფენებს.

"საქართველოში მოქმედმა რეპრესიულმა ნარკოპოლიტიკამ კიდევ ერთი უდანაშაულო ადამიანი იმსხვერპლა. 22 წლის დემურ სტურუას ფიზიკური და ფსიქოლოგიური ძალადობის გამოყენებით აიძულებდნენ პოლიციასთან თანამშრომლობას და თანასოფლელების დასმენას, რამაც სტურუა თვითმკვლელობამდე მიიყვანა.

სახელმწიფოს მიერ დანერგილი ნარკომანიასთან ბრძოლის სტრატეგიის სავალალო შედეგები უამრავმა ადამიანმა იწვნია საკუთარ თავზე. მისი ყოველდღიური პრაქტიკების დიდი ნაწილი ისევ უხილავი ქსელების მეშვეობით ფუნქციონირებს.

ამგვარი ძალადობრივი ქსელების მუშაობის წინაპირობას წლების განმავლობაში პოლიციისთვის მიცემული გადაჭარბებული ძალაუფლება ქმნის, რომლის საზოგადოებრივი კონტროლის მექანიზმები დღემდე არ არსებობს.

სამტრედიაში დატრიალებული ტრაგედია ამ სტრატეგიის ყველაზე უკიდურესი გამოვლინებაა. ჩვენ ჯერ კიდევ ვერ ვხედავთ პოლიციური ძალადობის სრულ სურათს და მის სავალალო შედეგებს, სწორედ ამიტომ, მომხდარი ძალადობის ფაქტი ჩვენი მხრიდან მკაცრ რეაგირებას მოითხოვს.

მომხდარი დანაშაული კიდევ ერთხელ გვარწმუნებს, რომ პოლიციური კონტროლის მექანიზმები საჯარო სივრცის მიღმა დარჩენილ, ხმაწართმეულ ადამიანებს განსაკუთრებული სიმკაცრით უსწორდება, მისი მოქმედების ძირითად სივრცეებს რეგიონები, სოფლები და გარეუბნები წარმოადგენენ". - ნათქვამია განცხადებაში.