საქართველოს პარლამენტში კონსტიტუციის იმ მუხლის შეცვლას ითხოვენ, რომლითაც მარიხუანის მოხმარება ლეგალური გახდა. კანონპროექტის მიღების შემთხვევაში, სახელმწიფოს საშუალება ექნება კონკრეტულ შემთხვევებში შეზღუდოს კონსტიტუციით გათვალისწინებული პიროვნების თავისუფალი განვითარების უფლება.

ინიციატივის ავტორი 16 მოქალაქეა, მათ შორის არიან ლალი მოროშკინა, ყოფილი პარლამენტარი კობა დავითაშვილი და პატრიოტთა ალიანსის დეპუტატი, პარლამენტიც ვიცე-სპიკერი, ირმა ინაშვილი. ინიციატორების განმარტებით, კანონპროექტის შემუშავების მიზეზი საკონსტიტუციო სასამართლოს 2018 წლის 30 ივლისის გადაწყვეტილებაა, რომლის მიხედვითაც მარიხუანას მოხმარება ლეგალური გახდა.

კანონპროექტის განმარტებითი ბარათის მიხედვით, დაკონკრეტდება კონსტიტუციის მე-12 მუხლი, რომელიც პიროვნების თავისუფალი განვითარების უფლებას განსაზღვრავს. კერძოდ, მე-12 მუხლს ემატება ორი ქვეპუნქტი, რომლის ფორმულირებაცაა:

  1. საკუთარი პიროვნების თავისუფალი განვითარების უფლება არ მოიცავს ადამიანის მიერ თვითგანადგურების, დეგრადირების ან თვითდაზიანების უფლებას;
  2. კანონით შეიძლება შეიზღუდოს ან აიკრძალოს ნარკოტიკული საშუალებების, ფსიქოტროპული ნივთიერებების, ფსიქოაქტიური ნივთიერებების, ადამიანზე სხვა მსგავსი ძლიერმოქმედი საშუალებებისა და ნივთიერებების, მათი ანალოგებისა და პრეკურსორების მოხმარება, გასაღება, დამზადება, წარმოება, დათესვა, მოყვანა, კულტივირება, შეძენა, შენახვა, გადაზიდვა, გადაგზავნა და ამ ქმედებასთან დაკავშირებული სხვა ქმედებები.

კანონპროექტი პარლამენტში ოფიციალურად დარეგისტრირებული არ არის. საპროცედურო საკითხა კომიტეტის თავმჯდომარის გიორგი კახიანის განცხადებით, 13 სექტემბრის სხდომაზე მხოლოდ საინიციატივო ჯგუფი დაარეგისტრირეს, რომლებიც ვალდებულები არიან მოაგროვონ 200 000 ხელმოწერა. პარლამენტი კანონპროექტს მხოლოდ ხელმოწერების შეგროვების შემდეგ დაარეგისტრირებს.