სახალხო დამცველის აპარატს მიაჩნია, რომ ზაზა სარალიძის აქციაზე პოლიციელების მიერ კარვების ჩამორთმევა შეკრების თავისუფლების შეზღუდვაა. ასე გამოეხმაურა ომბუდსმენის აპარატი გუშინ, 11 სექტემბერს თბილისში, პარლამენტის შენობის წინ პოლიციელების მხრიდან კარვების ჩამორთმევის საკითხს.

აპარატს მიაჩნია, რომ სახელმწიფოს მიერ აღნიშნული უფლებით სარგებლობის შეზღუდვა დაუშვებელია.

"ვინაიდან ზემოაღნიშნული შემთხვევაში არ იკვეთებოდა, რომ კარვის დადგმა გამოიწვევდა შენობის შესასვლელებისა და საავტომობილო გზის ბლოკირებას ან დაწესებულების საქმიანობის შეფერხებას, აღნიშნული სრულად არის დაცული შეკრების თავისუფლებით", — წერია სახალხო დამცველის აპარატის მიერ გავრცელებულ განცხადებაში.

ომბუდსმენი შინაგან საქმეთა სამინისტროს წარმომადგენლის განმარტებას არ იზიარებს, რომლის მიხედვითაც აქციაზე იყვნენ, სავარაუდოდ, ნასვამი პირები და ისინი პოლიციის თანამშრომლების მიმართ აგრესიას გამოხატავდნენ. უწყების ვერსიით, ვინაიდან კარავი ლითონის კონსტრუქციას შეიცავდა, ის შემდგომში დაპირისპირების თავიდან არიდების მიზნით ჩამოართვეს.

"მონიტორინგის შედეგებით, აგრეთვე მედიით გავრცელებული ინფორმაციით იკვეთება, რომ აქციის მონაწილეთა აგრესია სწორედ მათთვის კარვის გაშლის შესაძლებლობის შეზღუდვამ გამოიწვია და ამ შეზღუდვამდე რაიმე დაპირისპირებას ადგილი არ ჰქონია", — ვკითხულობთ განცხადებაში.