ხორავას ქუცაზე მოკლული დავით სარალიძის მამა, ზაზა სარალიძე აქციაზე #ნუმომკლავ სიტყვიერი შეურაცხყოფის მიყენებისთვის პოლიციელებს ბოდიშს უხდის. მისი თქმით, ისინი, ვინც ფორმასაა ამოფარებული და ღირსეულ თანამშრომლებს ღირსებას ულახავენ, პოლიციის რიგებს უნდა ჩამოშორდნენ.

"მე ბოდიშს ვუხდი პოლიციელებს, რომლებიც ჩემი შეურაცხყოფის მსხვერპლი გახდნენ და ბოდიშს ვუხდი იმ უღირსი პოლიციელების გამოც, ვინც არცხვენს ჩვენი პოლიციის მუნდირს", — დაწერა ზაზა სარალიძემ თავის ფეისბუქზე.

სარალიძე იმედოვნებს, რომ მათი უფროსებისგან ზეწოლა აღარ განმეორდება.

11 სექტემბერს, საღამოს საათებში რუსთაველის გამზირზე ადგილზე მყოფმა სამართალდამცავებმა აქციის #ნუმომკლავ მონაწილეებს კარვის გაშლის უფლება არ მისცეს, რასაც მათსა და პოლიციას შორის დაპირისპირება მოჰყვა. სწორედ ამ დროს მიაყენა ზაზა სარალიძემ პოლიციელებს სიტყვიერი შეურაცხყოფა. ამის შემდეგ შემდეგ ზაზა სარალიძე შეუძლოდ გახდა, რის შემდეგაც ის ინგოროყვას კლინიკაში გადაიყვანეს. სარალიძე მალხაზ მაჩალიკაშვილთან ერთად მეორე დღეა შიმშილობდა.

ზაზა სარალიძემ მალხაზ მაჩალიკაშვილთან ერთად აქციები 10 სექტემბერს განაახლა და მოთხოვნების დაკმაყოფილებამდე შიმშილობა დაიწყო. სარალიძე მთავრობის გადადგომასა და მისი შვილის მკვლელობის საქმის გამოძიებაში ხელისშემშლელი პირების დასჯას ითხოვს. მაჩალიკაშვილის მოთხოვნა, სარალიძის მსგავსად, მთავრობის გადადგომა და მისი შვილის მკვლელობაში მონაწილე პირების დასჯაა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რომლის მიხედვითაც დავით სარალიძის მკვლელი უცნობია, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.