თბილისის მერიის ინფორმაციით, საბურთალოს რაიონის გამგებელმა ბექა მიქაუტაძემ გოთუას 12-ში მცხოვრებ მოსახლეობას განუცხადა, რომ აღნიშნულ მისამართზე მშენებლობა შეჩერებულია.

„გოთუას 12-ში მშენებლობა არ გაგრძელდება, ვიდრე არ იქნება გეოლოგების კვალიფიციური დასკვნა მორღვეული კედლის გამაგრებისა და მშენებლობის გაგრძელების მიზანშეწონილობის თაობაზე“ - ეს განაცხადა საბურთალოს რაიონის გამგებელმა ბექა მიქაუტაძემ.

მოსახლეობასთან შეხვედრა ადგილობრივების თხოვნით შედგა. მათ გამგებელს მიმართეს, გატარდეს ისეთი ღონისძიებები, რომლითაც დაცული იქნება მათი უსაფრთხოება და მშენებლობას არ მოჰყვება არასასურველი შედეგები.

გოთუას #12-ში მიმდინარე მშენებლობისას კლდე 8 აგვისტოს ჩამოიშალა. შემთხვევას მსხვერპლი არ მოჰყოლია, თუმცა კლდე შლას განაგრძობს და აუცილებელია უსაფრთხოების ნორმების უზრუნველყოფა.

„როგორც ჩემთვის ცნობილია, უკვე მიმდინარეობს მუშაობა იმისათვის, რომ ჩატარდეს გეოლოგიური კვლევა. ამასთან, ჩვენ აუცილებლად გადავამოწმებთ მშენებლების მიერ წარმოდგენილი კვლევის დასკვნას და მშენებლობის გაგრძელება შესაძლებელი გახდება მხოლოდ მას შემდეგ, რაც სპეციალისტები გადაწყვეტენ, რომ მშენებლობა დასაშვებია და ის საფრთხეს არ შეუქმნის ადგილობრივ მოსახლეობას“ - განაცხადა მიქაუტაძემ.

შეხვედრას თბილისის მერიის ზედამხედველობის სამსახურის წარმომადგენელიც ესწრებოდა.