ხაშურის რაიონის სოფელ ცედანში ხანძარი ლიკვიდირებულია. ამის შესახებ საგანგებო სიტუაციების მართვის სამსახურის უფროსის მოვალეობის შემსრულებელმა, შალვა ხუციშვილმა განაცხადა.

მისი თქმით, სტიქიის ადგილზე დარჩება ჯგუფები მონიტორინგისთვის, რათა თავიდან ავიცილოთ რაიმე გართულება.

"ეს იყო ტყის ხანძრების ისტორიაში პირველი ხანძარი, რომლის ლიკვიდაციაც ასე სწრაფად მოხდა. ეს ძირითადად განპირობებულია ორი ფაქტორით. ერთი - ეს იყო ახალი ტექნიკისა და მეხანძრეების ერთობლივი ძალიან ეფექტური მუშაობა. მეხანძრეებმა მართლა ძალიან მაგრად იმუშავეს და მადლობა მათ ამისთვის და მეორე, ეს იყო ყველა სახელმწიფო უწყების ეფექტური კოორდინაცია. ძალიან აქტიურად იყო ჩართული შსს, თვითმმართველობის ტექნიკა და გუბერნატორის სამსახური და ასევე ძალიან დიდია მეტყევეების როლიც", - განაცხადა შალვა ხუციშვილმა.

მისი თქმით, ეს ორი ფაქტორი და ის შესყიდვები, რაც მთავრობამ განახორციელა ტყის ხანძრების მიმართულებით აძლევს საშუალებას მოსახლეობა დააიმედოს, რომ ბორჯომის მასშტაბის ხანძრების გამეორების რისკი მინიმალურია.

სამი დღის განმავლობაში, ცედანის ტყეში 220 მეხანძრე-მაშველი ებრძოდა სტიქიას. ხანძრის ქრობის პროცესში ჩართული იყო ვერტმფრენიც, რომლის გამოყენების საჭიროებაც დღეს მოიხსნა. წინასწარი მონაცემებით, განადგურებულია 10 ჰექტარზე მეტი ფართოფოთლოვანი ტყის მასივი.