ბავშვთა და ახალგაზრდობის ეროვნული ცენტრის უფროსის, გიგა გაბელაიას თქმით, გავრცელებული ინფორმაცია "მომავლის ბანაკში" მონაწილეების უფლებების დარღვევის შესახებ, სიცრუეა. საკითხს ცენტრის უფროსი ფეისბუქის საკუთარ გვერდზე ეხმაურება:

"ეს კამპანია ემსახურება "მომავლის ბანაკის" ათიათასობით მონაწილის დისკრიმინაციას. მსურს ბანაკის თითოეულ მონაწილეს, იმ ბავშვებს, რომლებიც მომავალში იქნებიან ბანაკების მონაწილეები, მათ მშობლებს, პედაგოგებს, საზოგადოებას მივმართო და აღვნიშნო, რომ "მომავლის ბანაკი" არის ჯანსაღი გარემო, სადაც მთავარი მამოძრავებელი მუხტი მეგობრობაა".

ახალგაზრდობის ცენტრის უფროსის თქმით, ბანაკის მთავარ მიზანს ახალგაზრდებში ეროვნული და პატრიოტული ღირებულებების გაღრმავება წარმოადგენს:

"მონაწილეთათვის რეკრეაციული, საგანმანათლებლო- შემეცნებითი, სპორტული და კულტურული გარემოა შექმნილი, მიმდინარეობს ჯანსაღი ცხოვრების წესის პოპულარიზაცია. 24 საათის განმავლობაში დაცულია მათი უსაფრთხოება, რასაც როგორც საპატრულო პოლიცია, ასევე სამაშველო სამსახური უზრუნველყოფენ. 24 საათის განმავლობაში ტერიტორიაზე მობილიზებულია სამედიცინო პერსონალი. პროგრამული ნაწილის გათვალისწინებითა და ასაკობრივი თავისებურებების გათვალისწინებით შედგენილია კვების მენიუ, რომლის ხარისხზეც მიმდინარეობს მუდმივი მონიტორინგი".

მანავის "მომავლის ბანაკმა" მუშაობა რამდენიმე დღის წინ შეაჩერა, თუმცა მოგვიანებით ტრენინგები განახლდა. საქმე ეხება ფეისბუქგვერდ "ზნეობაზე" გავრცელებულ წერილს, სადაც გურამ ფალავანდიშვილს მშობლის სტატუსით მიმართავს ბანაკის აქტივობებით უკმაყოფილო ბადრი დავითური.

ბავშვთა და ახალგაზრდობის ცენტრში განაცხადეს, რომ შეკითხვები 7-დღიანი საბანაკე პროგრამის მხოლოდ მესამე - ტოლერანტობის დღესთან დაკავშირებით გაჩნდა და ტრენინგები შეჩერდებოდა მანამ, სანამ გაეროს მოსახლეობის ფონდი სიტუაციას არ შეისწავლიდა.

ცენტრის ინფორმაციით, 19 აგვისტოს მანავის "მომავლის ბანაკის" ხელმძღვანელებს, 21 აგვისტოს კი ცენტრის მენეჯმენტს გურამ ფალავანდიშვილმა თანმხლებ პირებთან ერთად წარუდგინა ბადრი დავითურის განცხადება. წერილში ავტორი ამბობს, რომ ტრენინგის მონაწილეებს ათამაშებდნენ "სულიერებისთვის ხიფათის შემცველ თამაშებს".

ორგანიზაციის ხელმძღვანელმა, ედო დემეტრაშვილმა On.ge-სთან საუბარში განმარტავს, რომ მათი სესია ჯანსაღი ცხოვრების წესის ხელშეწყობას ეხებოდა, რასაც საერთაშორისო სტანდარტებისა და რეკომენდაციების გათვალისწინებით ახორციელებენ.

წერილში ნახსენებ ბრალდებებს ცრუს, ცილისმწამებლურსა და არასწორად ინტერპტრეტირებულს უწოდებს ორგანიზაცია Gydea, რომელიც არაფორმალური განათლების აქტივობებს ტრენინგებზე, წლებია ატარებს.

ორგანიზაციამ ფეისბუქის საკუთარ გვერდზე განცხადა, რომ ბადრი დავითურის წერილში მითითებული სავარჯიშოები, ემსახურება მოზარდებისთვის გენდერული სტერეოტიპების შესახებ ინფორმაციის მიწოდებასა და სტერეოტიპების დამსხვრევას.