ქართველ მუსლიმთა კავშირის თავმჯდომარე, ტარიელ ნაკაიძე ამბობს, რომ ფეხბურთელ გურამ კაშიას დაცვა თავისუფლებისა და ღირსების საკითხია. ასე გამოუცხადა ქართველ მუსლიმთა კავშირის თავმჯდომარემ ვიცე-კაპიტანს მხარდაჭერა ფეისბუქზე.

"გურამ კაშიას ვულოცავთ უეფას თანასწორობის ჯილდოს მიღებას და ვუსურვებთ წინსვლას თავის პროფესიულ საქმიანობაში. ვფიქრობ, დღეს გურამ კაშიას დაცვა ჩვენი თავისუფლებისა და ღირსების საკითხია. ეს, ამავე დროს, ნიშნავს ღიად პრორუსული და ფაშისტური ძალების წინააღმდეგ ბრძოლას, რაც ჩვენი ქვეყნის უსაფრთხოებისთვის ძალიან მნიშვნელოვანია", - წერს ნაკაიძე.

კაშიას მხარდასაჭერად სოციალურ ქსელებში კამპანია #გურამშენთანვართ მას შემდეგ დაიწო, რაც კაშიამ ვერიფიცირებული ფეისბუქგვერდი გააუქმა და ინსტაგრამის ანგარიში დახურა.

ინსტაგრამის სთორიში გურამ კაშიამ დაწერა: "სანამ ერთი გულშემატკივარი მაინც მეყოლება ჩვენც ქვეყანაში, იმ ადამიანებისთვის გამოვცხადდები ნაკრებში"

ინსტაგრამის სთორიში ქვეყნდება პოსტები ჰეშთეგით #გურამშენთანვართ და @37GK, რაც კაშიას ინსტაგრამის მისამართია. ფეისბუქის მომხმარებლები კი მხარდასაჭერად ჩარჩოს იყენებენ. ჩარჩოს საკუთარ პროფილზე დასაყენებლად, დააკლიკეთ აქ.

ამავე კამპანიის ფარგლებში კაშიას მხარდაჭერა გამოუცხადა ფეხბურთის ფედერაციის პრეზიდენტმა და ვიცე-პრეზიდენტმა, ნაკრების ფეხბურთელებმა, გიორგი მერებაშვილმა, გიორგი ლორიამ, ნიკა კეკვესკირმა და გიორგი ქვილითაიამ. კაშიას მხარდაჭერა გამოუცხადეს ქართული სპორტის ქომაგებმაც.

გასული წლის ოქტომბერში, ფეისბუკზე კაშიას ფოტოს გამოჩნდა, რომელზეც თამაშის დროს, ლგბტ დროშის ფერებში სამკლაური უკეთია. ფოტომ ქართველი მომხმარებლების ნაწილი გააღიზიანა.

რამდენიმე დღის წინ ცნობილი გახდა, რომ უეფა გურამ კაშიას ლგბტ თემის მიმართ გამოხატული მხარდაჭერისთვის დააჯილდოებს. #EqualGame უეფას ახალი ჯილდოა, რომელიც პირველად ქართველ ფეხბურთელს გადაეცა.

გურამ კაშიამ უეფასთან საუბარში განაცხადა, რომ ამ ჯილდოს მიღების გამო ძალიან ამაყობს.

"ვამაყობ, რომ უეფამ #EqualGame-ის ჯილდო მე გადმომცა. მე მჯერა, რომ ყველა ადამიანი თანასწორია, განურჩევლად იმისა, თუ რისი გწამს, ვინ გიყვარს და რას წარმოადგენ... მადლობა უეფას პრეზიდენტს ამ ჯილდოსთვის. სადაც არ უნდა ვითამაშო, ყოველთვის გავაგრძელებ თანასწორობის უფლებების დაცვას", - ამბობს კაშია.