ვიდეოს გავრცელებიდან ერთი თვეში, რომელშიც პარიზის ქუჩებში მომხდარი თავდასხმა ჩანს, საფრანგეთის პოლიციამ თავდასხმაში ბრალდებული კაცი დააპატიმრა. ინფორმაციას BBC ავრცელებს.

ბრალდებული ფსიქიატრიულ მკურნალობას გადიოდა, რადგან აგრესიული იყო. მის შესახებ არსებულ სამედიცინო ცნობაში ეწერა, რომ ის საშიშროებას უქმნიდა საკუთარ დედას.

თავდამსხმელი საავადმყოფოდან გამოსვლის შემდეგ დააპატიმრეს. მსხვერპლმა ის 28 აგვისტოს ამოიცნო.

ვიდეო ფეისბუქზე 25 ივლისს თავად მსხვერპლმა გაავრცელა და მას რამდენიმე მილიონი ნახვა აქვს. კადრებში ჩანს, რომ პარიზში კაცი ქალს საჯაროდ ესხმის თავს და რესტორნის გარეთ ურტყამს.

მარია ლაგუერი სახლში მიდიოდა, როდესაც, მისი სიტყვებით, კაცმა მას სექსუალური შინაარსის, შეურაცხმყოფელი სიტყვები მიაძახა და დაუსტვინა.

მარიას თქმით, მან უცნობს უთხრა, რომ ჯობდა გაჩუმებულიყო, რის შემდეგაც, ის მას გამოეკიდა და ჯერ საფერფლე ესროლა, შემდეგ კი, ფიზიკურად დაესხა თავს.

თავდასხმის მომენტი კაფის გარეთ მოხდა, შენობაზე არსებულმა კამერამ კი ინციდენტი სრულად ჩაიწერა. მოგვიანებით მარია ადგილზე დაბრუნდა და ჩანაწერი მოითხოვა.

ვიდეოს გავრცელებიდან რამდენიმე დღეში, საფრანგეთმა სექსუალური შევიწროების წინააღმდეგ კანონი მიიღო.

"ეს მიუღებელი ქცევაა და მსგავსი ყოველდღიურად ხდება. არ ვიცნობ ქალს, რომელსაც სექსუალური შევიწროების გამოცდილება არ აქვს. ქუჩაში სიარულის დროს თავს საფრთხეში არ უნდა ვგრძნობდე, ბევრი რამაა შესაცვლელი, რაც სასწრაფოდ უნდა მოხდეს", - დაწერა მარიამ ფეისბუქზე კანონის მიღებამდე.