Echowaves ფესტივალის ბოლო დღის მთავარი ჰედლაინერი სამხრეთაფრიკული ელექტროულ რეივ-რეპ და ჰიპ-ჰოპ დუეტი Die Antwoord იქნება. გამორჩეული ვიზუალი და ჟღერადობა, თამამი პერფორმანსები და ექსტრაორდინალური სასცენო იმიჯი Die Antwoord-ს თანამედროვე მუსიკალური სცენის ერთ-ერთ ყველაზე საინტერესო წარმომადგენლებად აქცევს.

პროექტი 2008 წელს კეიპტაუნში ორმა ახალგაზრდამ - Ninja-მ (Wtkin Tudor Jones) და Jolandi Visser-მა ჩამოყალიბეს. მათი შემოქმედება ალტერნატიულ ჰიპ ჰოპს, რეივ-რეპს და ელექტრონულ მუსიკას აერთიანებს. თავად Ninja კი ჯგუფის სტილს ასე ახასიათებს: "ეს არის ექსტრემალური, ფუტურისტული პოპ მუსიკა". Die Antwoord-ის სიმღერების ტექსტები ინგლისური და აფრიკული ენის ნაზავია.

განსაკუთრებული პოპულარობა დუეტმა 2010 წელს მოიპოვა, როდესაც მათი სიმღერა Enter the Ninja წლის ერთ-ერთი ჰიტი გახდა და ინტერნეტში ვირუსულ ვიდეოდ იქცა. მომდევნო წლებში ასევე დიდი წარმატება ხვდა წილად მათ სიმღერებს: Ugly Boy, Baby's On Fire და PitBull Terrier.

ბენდის იმიჯი და კონცეფცია სამხრეთაფრიკულ კონტრ-კულტურულ მოძრაობა Zef-თან არის დაკავშირებული. Zef თანასწორობის იდეას ემყარება და თეთრკანიანი სამხრეთ აფრიკელი მუშათა კლასის კულტურას ასახავს. "შენ ხარ ღარიბი, მაგრამ მოდური, ხარ ღარიბი, მაგრამ ხარ სექსუალური, გაქვს შენი სტილი" - ასე აღწერს Zef-ის და მისი ჯგუფის კონცეფციას იოლანდი ვისერი.

ჯგუფს 4 სტუდიური ალბომი, 2 EP და 20-ზე მეტი სინგლი აქვს გამოშვებული. მათი ახალი ალბომი სახელწოდებით 27 მიმდინარე წლის ბოლომდე უნდა გამოვიდეს.