"საქართველო დანამდვილებით არის ქვეყანა, რომელსაც უკრაინასთან ერთად აქვს დიდი ევროპული პერსპექტივა და ამას გამოხატავს", - ამის შესახებ გერმანიის კაცლერმა ანგელა მერკელმა თბილისის სახელმწიფო უნივერსიტეტში სტუდენტებთან შეხვედრისას განაცხადა.

მისი თქმით, საქართველოს აქვს მიღწევები ევროკავშირში გაწევრიანების მიმართულებით, თუმცა მნიშვნელოვანია ურთიერთობებისთვის ლეგალური გზები იყოს გამოძებნილი.

"ჩვენ უკვე დავდეთ ასოცირების, თავისუფალი ვაჭრობის შეთანხმება და უახლესი 10 წლის განმავლობაში ჩვენ გამოვყოფთ იმ ნაბიჯებს, რომელსაც სამომავლოდ გადავდგამთ. ადამიანთა შორის ურთიერთობები არის მნიშვნელოვანი, უმაღლესი განათლების მიღება, პროფესიული საქმიანობა, დასაქმება, ასევე ლეგალური გზების გამოძებნა ვიზალიბერალიზაციის ამოქმედების შემდეგ. ბევრი ჩამოვიდა საქართველოდან, როგორც თავშესაფრის მაძიებელი. ჩვენ უნდა ვნახოთ ლეგალური გზები, რათა ჩვენი ურთიერთობები გაღრმავდეს", - განაცხადა კანცლერმა.

მისი თქმით, რუსეთთან ურთიერთობების დალაგება ძალიან რთულია და ეს აფხაზეთისა და სამხრეთ ოსეთის შემთხვევით კარგად ჩანს.

"ყველაფერი უნდა გავაკეთოთ, რომ თქვენმა ქვეყანამ განავითაროს რეგიონული მოცემულობა. ძალიან რთულია რუსეთთან ურთიერთობის დალაგება. ჩვენ ვხედავთ, რა ხდება აფხაზეთისა და სამხრეთ ოსეთი მიმართ. გერმანიის აღმოსავლეთ პარტნიორობაზე ორიენტირებული პოლიტიკა პერსპექტივაზე ორიენტირებული იქნება. ჩვენი ურყევი მიზანია, რომ თქვენ ისევ ახლოს იყოს ევროპასთან", - განაცხადა ანგელა მერკელმა.

გერმანიის კანცლერის ორდღიანი ვიზიტი საქართველოში სტუდენტებთან შეხვედრით დაიწყო, რის შემდეგაც ანგელა მერკელი საოკუპაციო ხაზს ეწვევა.

ანგელა მერკელი საქართველოს ორდღიანი ოფიციალური ვიზიტით 23 აგვისტოს ეწვია. ეს 10 წლის შემდეგ საქართველოში კანცლერის პირველი ვიზიტია. ვიზიტის ფარგლებში ის შეხვდა საქართველოს პრემიერ-მინისტრს, მამუკა ბახტაძეს. შეხვედრის შემდეგ საერთო პრესკონფერენცია გაიმართა. კანცლერი საქართველოს პრეზიდენტს პირადად შეხვდა და შემდგომ ომში დაღუპულ გმირთა მემორიალი გვირგვინით შეამკო.