რეჟისორ გიგიშა აბაშიძის ფილმის, "მეზობლების" მსოფლიო პრემიერა მონრეალის საერთაშორისო კინოფესტივალზე გაიმართება. ფილმი სექცია Focus on World Cinema-ში იქნება წარმოდგენილი.

"მეზობლები" თბილისის ერთ-ერთი იტალიური ეზოს ყოველდღიურ ცხოვრებას ასახავს, რომელსაც ინვესტორების საქმიანი წინადადება თავდაყირა აყენებს. მეზობლები ვერ თანხმდებიან, სურთ თუ არა ძველ ბინებთან გამოთხოვება ახალაშენებულ კორპუსში საცხოვრებლის მიღების სანაცვლოდ.

გიგიშა აბაშიძეს On.ge ესაუბრა.

როგორი იყო ფილმზე მუშაობის პროცესი?

ძალიან გამიმართლა მსახიობებში, რომლებმაც ძალიან კარგად იმუშავეს თავიანთ როლებზე. გამიმართლა ასევე გადამღებ ჯგუფში, რომელიც ბოლომდე გვერდში მედგა და რომლის გარეშეც ძალიან გამიჭირდებოდა ფილმის დამთავრება. ჯგუფი ნახევრად მაკედონიელებისგან შედგებოდა: მეზობლები პირველი ქართულ-მაკედონიური კინოპროდუქცია იყო.

რატომაა მნიშვნელოვანი ის ფაქტი, რომ ამ ფესტივალზე შედგება ფილმის პრემიერა?

მონრეალის კინოფესტივალი ერთ-ერთი უძველესი და საკმაოდ დიდი ფესტივალია, რომელიც საშუალებას იძლევა, რომ ბევრმა ადამიანმა ნახოს ფილმი, რაც ძალიან მნიშვნელოვანია ქართული კინოსათვის.

როდის გამოვა საქართველოში?

საქართველოში ფილმის პრემიერა შესაძლოა მოხდეს თბილისის კინოფესტივალზე, თუ რა თქმა უნდა ფესტივალმა აიღო ფილმი. ამ შემთხვევაში ფილმის ქართული პრემიერა დეკემბერში შედგება. რაც შეეხება კინოთეატრებს მომავალი წლის გაზაფხულიდან ფილმს უკვე კინოთეატრებშიც დავაყენებთ.

მონრეალის კინოფესტივალი სტარტს 23 აგვისტოს აიღებს.