შავი ზღვის საერთაშორისო უნივერსიტეტის მხარდასაჭერად დღეს, 21 აგვისტოს 16 საათზე განათლების სამინისტროსთან აქცია გაიმართება. აქციაზე "Iamwithibsu" მისული პირები უნივერსიტეტისთვის სტუდენტების მიღების ერთი წლით შეზღუდვას გააპროტესტებენ. აქციის ორგანიზატორები გადაწყვეტილებას უსამართლოსა და არაარგუმენტირებულს უწოდებენ.

თბილისის პარალელურად აქცია ბათუმშიც გაიმართება. აქციის მონაწილეები 16 საათზე ვარდების ბაღთან შეიკრიბებიან.

შავი ზღვის საერთაშორისო უნივერსიტეტს სტუდენტების მიღების უფლება ერთი წლის ვადით შეეზღუდა. უმაღლესი საგანმანათლებლო დაწესებულებების ავტორიზაციის საბჭოს მიერ 2018 წლის 20 აგვისტოს მიღებული გადაწყვეტილებით, მიუხედავად იმისა, რომ სასწავლებელს ავტორიზაცია 6 წლით გაუგრძელდა, ისინი წელს სტუდენტებს ვერ მიიღებენ.

უნივერსიტეტის საზოგადოებასთან ურთიერთობის სამსახურის ცნობით, შავი ზღვის საერთაშორისო უნივერსიტეტს 2013 წელს საგადასახადო ჯარიმა დაეკისრა. ჯარიმის ოდენობა 700 ათასი ლარია და მისი სამართლიანობის შესახებ ამჟამად სასამართლო დავა მიმდინარეობს. ჯარიმის გამო უნივერსიტეტის ქონებას ყადაღა ადევს. უნივერსიტეტის პრესსამსახურის თქმით, სასამართლო დავის წაგების შემთხვევაში ისინი მზად არიან, დაფარონ საგადასახადო ჯარიმა.

IBSU-ში მიაჩნიათ, რომ საბჭოს გადაწყვეტილება არაა ადეკვატური და მას უსაფუძვლოს და უსამართლოს უწოდებენ. ამის მიზეზებად უნივერსიტეტში ასახელებენ შემდეგს:

  • შავი ზღვის საერთაშორისო უნივერსიტეტის უძრავი ქონება და სხვა აქტივები მრავალჯერ აღემატება 700 000 ლარს;
  • ავტორიზაციის საბჭოს მიერ მიღებული გადაწყვეტილება მხოლოდ მიმდინარე წელს 2 მილიონ ლარამდე ამცირებს უნივერსიტეტის შემოსავალს (რაც მრავალფეროვან საგანმანათლებლო მიზნებს მოემსახურებოდა).

საქართველოს განათლების სამინისტროს განცხადებით, იმ აბიტურიენტებისთვის, რომლებსაც შავი ზღვის საერთაშორისო უნივერსიტეტში ჩაბარება სურთ, რიგგარეშე მობილობა გამარტივებული წესით გამოცხადდება. ეს ნიშნავს, რომ ისინი სხვა ავტორიზებულ საგანმანათლებლო დაწესებულებებს აირჩევენ და ახალ სასწავლო წელს დანარჩენ სტუდენტებთან ერთად დაიწყებენ.