BASSIANI-ს დამფუძნებელი, ტატო გეთია აცხადებს, რომ კლუბის რეზიდენტებს არაერთხელ დაუკრავთ რუსეთში, მათ შორის მოსკოვშიც. მისი თქმით, "სერიოზული ხარვეზი" ჰქონდათ და ვერ გათვალეს, რომ ფესტივალის შესახებ ინფორმაცია ომის 10 წლისთავზე დაიდებოდა. ასე გამოეხმაურა გეთია მოსკოვში დაგეგმილი ივენთის გაუქმებას, რომელზეც კლუბის რეზიდენტებს უნდა დაეკრათ.

გეთია ბოდიშს უხდის კლუბის რეზიდენტებს და ამბობს, რომ არ იმსახურებდნენ "იმ ღვარძლს და ტალახს, რაც მათ ბოლო დღეებში მოხვდათ." მისი თქმით, მიუხედავად არათანმიმდევრული და უსაფუძვლო კრიტიკისა, თანამოაზრეებისა და ნაცნობებისგან გულახდილი წყენა იგრძნეს და ღონისძიებაც ამიტომ გაუქმდა.

"ასევე, გარკვეული ძალებისგან წამოვიდა სერიოზული ისტერიული ტალღა, გაშუქდა ტელევიზიებში. მოკლედ, ძალიან დიდი რეზონანსი მოყვა თემას - საუბრები, სხვადასხვა ინტერპრეტაციები გავრცელდა მთელი ქვეყნის მასშტაბით", - წერს გეთია.

გეთია ამბობს, რომ სცენა, სადაც დაკვრას აპირებდნენ რადიკალურად განსხვავდება ტიპური შოუ-ბიზნესისგან. მისივე თქმით, მასთან დაკავშირებულ ადამიანებს აერთიანებთ საერთო ღირებულებები და არა საზღვრები.

"ასევე, იმასაც გეტყვით, რომ არც კლუბს და არც ლეიბლს შემოსავალი (გარდა ამ ჰონორარების 15%-ის) არცერთი შოუქეისიდან არ აქვს, იქნება ეს ბელგრადი, შტუდგარტი, ოსლო, მეხიკო, სანქტ-პეტერბურგი თუ მოსკოვი."

გეთიას თქმით, ხალხი რომელიც იმ ფესტივალში მონაწილეობდა მაისის მოვლენების დროს BASSIANI-ს გვერდით ედგა და მათ გაცილებით მძიმე პრობლემები აქვთ ამ კუთხით საკუთარ ქვეყანაში.

გეთია წერს, რომ თუკი ქართველი საზოგადოება მსგავსი მონდომებით და ძალისხმევით საკუთარ ხელისუფლებას მოსთხოვს "რაღაც-რაღაცეებს, როგორც ბასსიანს" მაშინ უკეთეს სახელმწიფოში იცხოვრებენ.

9 აგვისტოს გავრცელდა ინფორმაცია, რომ სექტემბერში, მოსკოვში გასამართ ელექტრონული მუსიკის ფესტივალზე, Red Bull Music Events-ზე ქართველი არტისტებიც მიიღებდნენ მონაწილეობას. საზოგადოების ნაწილის პროტესტის შემდეგ კლუბმა ღონისძიება გააუქმა.