ტაივანის საავადმყოფოში გაჩენილი ხანძრის შედეგად სულ მცირე ცხრა ადამიანი გარდაიცვალა. BBC-ის ინფორმაციით, კრიტიკულ მდგომარეობაშია 16 დაშავებული, რომელთაგანაც ნაწილი პაციენტია, ნაწილი კი საავადმყოფოს თანამშრომელი.

ხანძარი ადგილობრივი დროით, 13 აგვისტოს, ღამით ახალი ტაიბეის ერთ-ერთი საავადმყოფოს მეშვიდე სართულზე, პალატაში გაჩნდა. ხანძრის გამომწვევი მიზეზი ამ დრომდე უცნობია, თუმცა მედიის ინფორმაციით, ეს შესაძლოა მოძრავი საწოლის ელექტროდაზიანებასთან იყოს დაკავშირებული. ადგილობრივი მედიის ინფორმაციით, პოლიციამ დაადგინა, რომ პალატა, სადაც ცეცხლი თავდაპირველად გავრცელდა, არ იყო აღჭურვილი საჭირო ცეცხლსაწინააღმდეგო მოწყობილობით.

შემთხვევის შემდეგ ვეიფუს საავადმყოფოდან 33 პაციენტისა და სამი თანამშრომლის ევაკუაცია განხორციელდა.

BBC-ის ცნობით, ტაივანში ხანძარსაწინააღმდეგო ზომები მკაცრად არაა დაცული, რის გამოც ხანძარი ხშირად ჩნდება. 2012 წელს ხანძრის შედეგად 12 პაციენტი გარდაიცვალა, ხოლო 60 ადამიანი დაშავდა.