"მე არ მაქვს მოლოდინი, მე მაქვს იმედი", - ასე უპასუხა პრეზიდენტობის კანდიდატმა, სალომე ზურაბიშვილმა საპრეზიდენტო არჩევნებში ქართული ოცნების მხარდაჭერის შესახებ კითხვას.

მან, ასევე, აღნიშნა, რომ მმართველი პარტიის მხარდაჭერა მისთვის მნიშვნელოვანია. ზურაბიშვილმა აღნიშნა, რომ დამოუკიდებელი კანდიდატია, თუმცა დამოუკიდებლობა არ ნიშნავს, "რომ არავის მხარდაჭერა არ გჭირდება".

"ეს ჩვენ ვიცით ცხოვრებიდან, ვიცით მსოფლიოში. საქართველოს დამოუკიდებლობა, როგორც სახელმწიფოსი, არ არსებობს, თუ არ ვართ დამოკიდებული ამერიკისა და ევროპის მხარდაჭერაზე. მარტო საქართველოც ვერ იქნება და მეც ვერ ვიქნები", - განაცხადა საპრეზიდენტო კანდიდატმა იმედის ეთერში.

საპრეზიდენტო არჩევნები 28 ოქტომბერს გაიმართება. ქართულმა ოცნებას პარტიული კანდიდატი არ ეყოლება. პარლამენტის ვიცე-სპიკერმა, გია ვოლსკიმ განაცხადა, რომ გუნდში მიმდინარეობს მსჯელობა, რომ ან სალომე ზურაბიშვილს დაუჭერენ მხარს, ან საერთოდ არ ჩაერევიან ამ პროცესში.

რამდენიმე დღის წინ პრემიერ-მინისტრმა მამუკა, ბახტაძემ განაცხადა, რომ სალომე ზურაბიშვილის მხარდაჭერის საბოლოო გადაწყვეტილება ჯერ არ მიუღიათ.