პრემიერ-მინისტრის, მამუკა ბახტაძის განცხადებით, მმართველ გუნდს საპრეზიდენტო არჩევნებში სალომე ზურაბიშვილის მხარდაჭერის საბოლოო გადაწყვეტილება ჯერ არ მიუღია. ამის გამო პრემიერმა უარი თქვა, შეეფასებინა ზურაბიშვილის განცხადებები აგვისტოს ომთან დაკავშირებით.

პრეზიდენტობის დამოუკიდებელი კანდიდატი სალომე ზურაბიშვილი აცხადებს, რომ აგვისტოს ომი საქართველომ დაიწყო. 8 აგვისტოს მუხათგვერდის სასაფლაოზე მან კიდევ ერთხელ თქვა, რომ საერთაშორისო პარტნიორებმა გააფრთხილეს ექს-პრეზიდენტი, მიხეილ სააკაშვილი, რომ სამხედრო ნაბიჯი არ გადაედგა.

საპრეზიდენტო არჩევნები 28 ოქტომბერს გაიმართება. ქართულმა ოცნებას პარტიული კანდიდატი არ ეყოლება. პარლამენტის ვიცე-სპიკერმა გია ვოლსკის განაცხადა, რომ გუნდში მიმდინარეობს მსჯელობა, რომ ან სალომე ზურაბიშვილს დაუჭერენ მხარს, ან საერთოდ არ ჩაერევიან ამ პროცესში.

პრემიერ-მინისტრმა მამუკა ბახტაძემ რამდენიმე დღის წინ აღნიშნა, რომ თუკი ქართულ ოცნებას საკუთარი კანდიდატი არ ეყოლება, ეს დემოკრატიისთვის უკეთესი იქნება. დღეს, 9 აგვისტოს ბრიფინგზე მან კიდევ ერთხელ დაადასტურა, რომ მმართველ გუნდს პარტიული კანდიდატი არ ეყოლება.