ახლახან ცნობილი გახდა, რომ ივლისში გრენლანდიაში ჩამოვარდნილმა მეტეორმა 2,1-კილოტონიანი აფეთქება გამოიწვია.

აფეთქება ამერიკის შეერთებული შტატების სამხედრო ბაზის ჩრდილოეთით მოხდა. ნასას მონაცემებით, ობიექტი დაახლოებით 25 კმ/წმ-ის სიჩქარით მოძრაობდა. თავად ობიექტის ზომა ცნობილი არაა. მეტეორი გრენლანდიაში არსებული ამერიკული ბაზიდან, რომლის მიზანიც ბირთვული ბალისტიკური რაკეტების დაფიქსირებაა, 43 კილომეტრში ჩამოვარდა.

საინტერესო ისაა, რომ მსოფლიომ აფეთქების შესახებ არა მთავრობის ოფიციალური წარმომადგენლებისგან, არამედ ამერიკელ მეცნიერთა ფედერაციის ბირთვული ინფორმაციის პროექტის დირექტორ ჰანს კრისტენსენის ტვიტიდან შეიტყო.

"Thule-ს საჰაერო ბაზიდან 43 კილომეტრის დაშორებით მეტეორი ჩამოვარდა, რომელმაც 2.1 კილოტონიანი აფეთქება გამოიწვია.

ჩვენ ჯერჯერობით კვლავ ცოცხლები ვართ. საბედნიეროდ, ამერიკელები მიხვდნენ, რომ აფეთქება მეტეორმა გამოიწვია და არა რუსების დარტყმამ. ამერიკის მთავრობას თითქმის 2,000 ბირთვული რაკეტა მუდმივ მზადყოფნაში ჰყავს."

კრისტენსენი ამბობს, რომ ასეთი მოვლენის შემდეგ ამერიკის მთავრობისგან სრული სიჩუმე დამაფიქრებელია.

მსგავსი შემთხვევები ხშირი არ არის, მაგრამ მათ შესახებ წინასწარ ცოდნა მაინც აუცილებელია. 2013 წლის 15 თებერვალს რუსეთში, ქალაქ ჩელიაბინსკის თავზე მოულოდნელად 20 მეტრის სიგანის მეტეორი აფეთქდა. შეჯახებით გამოწვეულმა ტალღამ ქალაქის ინფრასტრუქტურა დააზიანა და 1 500-მდე ადამიანის დაშავება გამოიწვია.

მეცნიერების თქმით, დედამიწის ატმოსფეროში ყოველ 13 დღეში ერთი მეტეორი მაინც ხვდება, თუმცა მათი უმრავლესობა ხმელეთთან მიახლოებამდე იწვება და საფრთხეს არ წარმოადგენს.