საქართველოს სახალხო დამცველი სვანეთში მიმდინარე აქციებს ეხმიანება და აცხადებს, რომ სამართალდამცავთა მხრიდან აქციის მონაწილე პირთა შეკრებისა და მანიფესტაციის თავისუფლება არ უნდა შეიზღუდოს. ომბუდსმენი მოუწოდებს შეკრებილებს, პროტესტი მშვიდობიანი ფორმით გამოხატონ.

სახალხო დამცველის აპარატის წარმომადგენელი ხელისუფლების წარმომადგენლებსა და აქციის მონაწილეებს შორის მოლაპარაკებების პროცესს ესწრებოდა და მონიტორინგს გაუწევს საპროტესტო აქციას მის დასრულებამდე.

საჭიროების შემთხვევაში, მოქალაქეთათვის მუდმივ რეჟიმში ხელმისაწვდომია სახალხო დამცველის აპარატის ცხელი ხაზი - 598 08 30 06.

დღეს, 26 ივნისს, მესტიის მუნიციპალიტეტის სოფლებში - ჭუბერი, ხაიში და ილდიანი ფინანსთა სამინისტროს საგამოძიებო სამსახურის მიერ გატარებული საპროცესო ღონისძიებები ადგილობრივმა მოსახლეობამ ჭუბერში და მოგვიანებით ხაიშში გააპროტესტა, სადაც მონაწილეების მიერ გადაიკეტა ზუგდიდი-მესტიის დამაკავშირებელი გზა.