როგორც აღმოჩნდა, იხვების სამყარო ბევრად უფრო საინტერესოა, ვიდრე გვგონია და, ალბათ, ამ საკითხზე არ ვისაუბრებდით, რომ არა ბრენტ ციზეკი და მის მიერ გადაღებული ფოტო, რომელზეც მდედრი იხვი და მის უკან ჩამწკრივებული 76 ჭუჭულია გამოსახული.

უჩვეულო სანახაობას მოყვარული ფოტოგრაფი მინესოტაში, ტბა ბემიჯიზე წააწყდა.

"იხვი და მის უკან ჩამწკრივებული პატარები იშვიათი მოვლენა არაა. 20 და 30-იც გვინახავს, მაგრამ 70-ზე მეტი ჯერ არავის დაუფიქსირებია", - ამბობს რიჩარდ ო. პრუმი, იელის უნივერსიტეტის ორნიტოლოგი.

საქმე ის არის, რომ ტბის მახლობლად უამრავი მდედრი ტოვებს საკუთარ კვერცხებს. გამოჩეკვის შემდეგ კი პატარებზე ყველაზე გამოცდილი და შედარებით უფროსი იხვი ზრუნავს. ეს ერთგვარი საბავშვო ბაღია, რომელსაც სათავეში "ბებია იხვი" უდგას და არა, ყველა ეს ჭუჭული მას ნამდვილად არ გამოუჩეკია.

ექსპერტების აზრით, ეს ერთგვარი მზრუნველობითი სისტემაა, რომელიც ფრინველებს უსაფრთხოდ და წარმატებით გამრავლებაში ეხმარება.