ტინდერი ყოველწლიურად უფრო და უფრო პოპულარული ხდება, მაგრამ თუ მაინც ისე მოხდა, რომ ამ აპლიკაციის შესახებ არაფერი გსმენიათ, მარტივად აგიხსნით.

რეგისტრირდებით, უთითებთ, რა ასაკის და სქესის ადამიანს ეძებთ გასაცნობად და იწყებთ შერჩევას. ეკრანზე თითის მარცხნივ გადასმით (ამ მოძრაობას სვაიპი ჰქვია) კანდიდატს იწუნებთ, მარჯვნივ გადასმით კი მოწონებას გამოხატავთ. თუ ისე მოხდა, რომ ვინც თქვენ მოგწონთ, ისიც მოიხიბლა თქვენით, აპლიკაცია გატყობინებთ, რომ It's a Match (ფერი ფერსა, მადლი ღმერთსაო) და შეგიძლიათ მიმოწერა დაიწყოთ.

პატრიარქალური გარემოებების გათვალისწინებით, გოგოებისთვის ძალიან ადვილია Match-ების შეგროვება, ბიჭებს კი ეს ნაწილი შედარებით უჭირთ.

გლაზგოელმა ბიჭმა ამ პრობლემის მოსაგვარებლად გენიალურ და ცოტა ამორალურ ხერხს მიაგნო.

"ახალი იდეა ტინდერისათვის: ჩემი ყველა ფოტო უკუღმა ავტვირთე, რომ გოგოებმა მათ დასათვალიერებლად ტელეფონი ამოატრიალონ. მერე, რა თქმა უნდა, ხვდებიან, რომ მახინჯი ვარ და მარცხნივ აკეთებენ სვაიპს, მაგრამ ვერ ხვდებიან, რომ სინამდვილეში მარჯვენა მხარეს დააჭირეს. ბუმ! It's a match"

ფოტო: Ethan Woodford

ითანის პოსტს ტვიტერზე საოცარი გამოხმაურება მოჰყვა და ბიჭის გონებამახვილურმა რჩევამ გოგოების ყურადღებაც მიიპყრო. ამ ეტაპზე მას თავისუფლად შეუძლია, აპლიკაცია ტელეფონიდან წაშალოს და მხოლოდ ტვიტერს დასჯერდეს.