ასტრონომია ერთ-ერთი ყველაზე ძველი მეცნიერებაა, რომელიც მას შემდეგ არსებობს რაც ადამიანმა ორ ფეხზე გადაადგილება დაიწყო. ადამიანებს ციური ობიექტების მიმართ ყოველთვის განსაკუთრებული ინტერესი გვქონდა და მუდამ ვცდილობდით, აგვეხსნა, თუ რას წარმოადგენდა ცაში გამოკიდებული მანათობელი ობიექტები. დაახლოებით 400 წლის წინ კი, პირველი ტელესკოპის გამოგონებამ საშუალება მოგვცა უკეთ შეგვესწავლა ის ციური სხეულები, რომლებიც ჩვენში ინტერესს უხსოვარი დროიდან აღძრავდა. მას შემდეგ დიდი დრო გავიდა და ახლა ჩვენ უკვე შეგვიძლია სხვადასხვა პლანეტებზე ხომალდები გავუშვათ და აქამდე შეუძლებელი კადრები აღვბეჭდოთ.

აქ არის ჩვენი მზის სისტემის 10 საინტერესო, ან უბრალოდ ლამაზი ფოტო.

1. პირველი ფოტო კოსმოსიდან

1946 წლის 24 ოქტომბერს ამერიკელმა მეცნიერებმა 35-მილიმეტრიანი კამერა რაკეტა V2-ზე დაამაგრეს, რომელიც მათ მეორე მსოფლიო ომის შემდეგ ხელში გერმანელებისგან ჩაუვარდათ. რაკეტამ ატმოსფეროში დაახლოებით 100 კილომეტრის სიმაღლეს მიაღწია და დედამიწის პირველი ფოტო გადაიღო.

2. დედამიწის პირველი ფოტო მთვარიდან

1966 წლის 23 აგვისტოს ჩვენ დედამიწის პირველი ფოტო მივიღეთ, რომელიც მთვარიდან იყო გადაღებული.

3. მზის ჩასვლა მარსზე

2005 წელს ნასას თვითმავალმა რობოტმა ეს ფოტო გადაიღო, სადაც ჩანს, თუ როგორ მშვიდად იძირება მზე გუსევის კრატერის მიღმა, მარსის ჰორიზონტზე. მარსის ატმოსფეროში გაფანტული მტვრისა და ქვიშის ნაწილაკების ზომის გამო, მასში ლურჯი ფერის სხივები უფრო ეფექტურად აღწევს, რაც ატმოსფეროს ლურჯ შეფერილობას ანიჭებს.

4. ტიტანის ზღვებზე არეკლილი მზის სხივები

სურათზე ჩანს, თუ როგორ ირეკლება მზის სხივები სატურნის მთვარე ტიტანზე არსებულ მეთანის ზღვაზე. ფოტო ნასას ხომალდმა Cassini-მ გადაიღო, რომელმაც სატურნის ორბიტაზე 13 წელი გაატარა. მან არსებობა 2017 წლის 15 სექტემბერს სატურნთან შეჯახებით დასრულა.

5. დედამიწის ამოსვლა მთვარეზე

ეს სურათი, რომელიც ერთი შეხედვით კომპიუტერულ გრაფიკას ჰგავს 2015 წელს ნასას ხომალდმა გადაიღო. მთვარე ასე უცნაურად ატმოსფეროს არარსებობის გამო გამოიყურება.

6. პლუტონი

ეს ფოტო ხომალდმა New Horizons-მა პლუტონთან მაქსიმალურად მიახლოების შემდეგ 15 წუთში გადაიღო. ფოტოზე ვხედავთ პლუტონის ზედაპირზე არსებულ ყინულის მთებსა და ვაკეებს. ეს სავარაუდოდ პლუტონის ყველაზე მაღალი გარჩევადობის ფოტოა, რომელიც მომავალი რამდენიმე ათწლეულის განმავლობაში გვექნება. ამ ეტაპზე პლუტონის მიმართულებით ახალი მისია დაგეგმილი არ არის.

7. კომეტა 67P/ ჩურიუმოვ-გერასიმენკო

ეს ფოტო ევროპული კოსმოსური სააგენტოს ხომალდმა Rosetta-მ გადაიღო. ფოტოში მას თავისი სამიზნე კომეტისგან 16 კილომეტრი აშორებს. ხომალდმა კომეტის გარშემო ისეთი ორგანული ნივთიერებები დააფიქსირა, როგორიც გლიცინია. გლიცინი ამინომჟავაა, რომელიც ჩვენს ორგანიზმში დიდი რაოდენობით გვხვდება. ის კანის ერთ-ერთი ძირითადი კომპონენტია. ეს მიანიშნებს იმას, რომ დედამიწაზე სიცოცხლის განვითარებისთვის აუცილებელი ნივთიერებები შეიძლება კომეტების მეშვეობითაც მოხვედრილიყო.

8. დღე, როდესაც დედამიწამ გაიღიმა

2013 წლის 19 ივლისს ხომალდი Cassini მზის საპირისპირო მხარეს სატურნის ჩრდილში მოექცა და მას თავის შვიდ მთვარესთან ერთად სურათი გადაუღო. მარჯვენა უკანა ფონზე კი პაწაწინა ლურჯი წერტილი მოსჩანს, რომელიც Cassini-ს მშობლიური პლანეტა დედამიწაა. სურათს კი სახელი NASA-ს კამპანიიდან გამომდინარე დაერქვა, რომლის ფარგლებშიც 19 ივლისს ადამიანებმა მსოფლიოს ყველა ქვეყნიდან ცაში აიხედეს და ხომალდს ხელი დაუქნიეს.

9. ქვიშის ტორნადო მარსზე

მარსზე ქვიშის ტორნადოები საკმაოდ ხშირია. ისინი შეიძლება დედამიწისეულ ქვიშის ტორნადოებზე 50-ჯერ უფრო დიდი ზომის იყვნენ და მათ შეუძლიათ ჩვენს გაგზავნილ თვითმავალ რობოტებს პრობლემები შეუქმნან. თუმცა, რამდენჯერმე პირიქით მოხდა. ქვიშის ტორნადოებმა რობოტების მზის პანელებზე დაგროვილი ქვიშა მიმოფანტა, რამაც რობოტების ენერგიის გამომუშავება გაზარდა.

10. მკრთალი ლურჯი წერტილი

ყველასთვის კარგად ცნობილი ფოტო, რომელიც ხომალდმა Voyager 1-მა დედამიწიდან 6 მილიარდი კილომეტრის დაშორებით გადაიღო. სურათზე მარჯვნივ არსებულ სიცარიელეში გამოკიდებული მკრთალი ლურჯი წერტილი კი დედამიწა, ანუ ჩვენი სახლია.