საქართველოს პრემიერ-მინისტრი მამუკა ბახტაძე, ბრიუსელში სამუშაო ვიზიტის ფარგლებში, ევროპული საბჭოს პრეზიდენტ დონალდ ტუსკს შეხვდა. მხარეებმა განიხილეს საქართველო-ევროკავშირს შორის არსებული ურთიერთობები და სამომავლო თანამშრომლობის პერსპექტივები.

ევროკავშირის პრეზიდენტმა დონალ ტუსკიმ პრემიერთან შეხვედრა ტყიბულის ტრაგედიაზე საუბრით დაიწყო. მან სამძიმარი გამოუცხადა ტყიბულის მაღაროში დაღუპულთა ოჯახებს და დაშავებულებს კი, სწრაფი გამოჯანმრთელება უსურვა. დონალ ტუსკის განცხადების ქართული ვერსია საქართველოს მთავრობის ადმინისტრაციამ გაავრცელა.

დონალდ ტუსკიმ განაცხადა, რომ ევროპის კავშირი და საქართველო ახლო მეგობრები და პარტნიორები არიან.

"პრემიერ-მინისტრმა და მე შეხვედრაზე კვლავ დავადასტურეთ მზადყოფნა ამბიციური ასოცირების შეთანხმების საფუძველზე ეკონომიკური თანამშრომლობის შემდგომი გაგრძელებისა და ყოველივე ამაში ვითვალისწინებთ ევროკავშირთან საქართველოს პოლიტიკური ასოცირების და ეკონომიკური ინტეგრაციის სტრატეგიულ მნიშვნელობას", - განაცხადა დონალდ ტუსკიმ.

შეხვედრაზე ტუსკიმ ხაზი გაუსვა, რომ ევროკავშირი რჩება საქართველოს წარმატებული რეფორმების პროცესის ძლიერ მხარდამჭერად. მხარეები ამ ძალისხმევის გაგრძელების საჭიროებაზე შეთანხმდნენ და რეგიონში არსებული სიტუაციაც განიხილეს. ტუსკის თქმით, საქართველო გამოწვევებით აღსავსე სამეზობლოში იმყოფება და გადამწყვეტ როლს ასრულებს ურთიერთობათა დალაგების, ხელშეწყობისა და "ხიდების აგების" სფეროში.

"ევროკავშირი აფასებს ამ კუთხით საქართველოს ძალისხმევას და ველით თქვენთან მუშაობის გაგრძელებას რეგიონში სტაბილურობის, უსაფრთხოებისა და განვითარების ხელშეწყობის მიზნით", - განაცხადა დონალდ ტუსკიმ.

ევროსაბჭოს პრეზიდენტის თქმით, ის აფასებს საქართველოს კონსტრუქციულ როლს "აღმოსავლეთ პარტნიორობის" ფორმატში, ისევე როგორც ევროპული და ტრანს-ატლანტიკური მისიების ფარგლებში უსაფრთხოების უზრუნველყოფის გამო.

ტუსკიმ 2008 წლის აგვისტოს 10 წლისთავზეც ისაუბრა. მისი თქმით, ევროკავშირს სურს საქართველოს ურყევი მხარდაჭერა აღუთქვას ქვეყნის სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მიმართ.

"მნიშვნელოვანია აღინიშნოს, რომ გასული 10 წლის განმავლობაში საქართველომ წარმატებით მოახერხა დემოკრატიული ინსტიტუტების გაძლიერება და აყვავებული ეკონომიკის შექმნა. ევროპის კავშირი გააგრძელებს ქვეყნის მხარდაჭერას, მისი გამძლეობის და შესაძლებლობათა გაძლიერების მიზნით, რათა კონფლიქტის მშვიდობიანი გადაწყვეტა იქნას მიღწეული", - განაცხადა დონალდ ტუსკიმ.

ამ კონტექსტში დონალდ ტუსკიმ პოზიტიურად შეაფასა საქართველოს ინიციატივა "ნაბიჯი უკეთესი მომავლისკენ", რომელიც ახალ სავაჭრო და საგანმანათლებლო შესაძლებლობებს სთავაზობს აფხაზეთსა და სამხრეთ ოსეთში მცხოვრებ ადამიანებს.

"მზად ვართ, ამ პროგრამის განხორციელებაში შემდგომი დახმარება აღმოგიჩინოთ", - განაცხადა ტუსკიმ.