სმიტების ოჯახის მკვლელობაში ბრალდებულს, მალხაზ კობაურს მცხეთის რაიონულმა სასამართლომ აღკვეთის ღონისძიებად პატიმრობა შეუფარდა.

ბრალდებულმა სასამართლო პროცესზე განაცხადა, რომ მკვლელობაში დამნაშავე ის არაა:

"ისინი მე არ დამიხოცავს, ორი უცხოელი კაცი იყო, მათ დახოცეს და დამემუქრნენ, დედმამისშვილებს დაგიხოცავთო", - როგორც საზოგადოებრივი მაუწყებელი წერს, ეს ბრალდებულმა სასამართლო სხომაზე განაცხადა, სადაც მის აღკვეთის ღონისძიებაზე მსჯელობენ.

საქმის დეტალები

შინაგან სამეთა სამინისტროს ინფორმაციით, 6 ივლისს, 112-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირის და მათი 4 წლის შვილის დაკარგვის შესახებ. შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

პოლიციელებმა სოფელ წკერეში დაკარგული ტურისტების კუთვნილი ავტომანქანა და პირადი ნივთები აღმოაჩინეს. მაშველებმა დაკარგული ტურისტი ქალი, ავტომანქანიდან, დაახლოებით, 3 კილომეტრში, ხევში, ჩანჩქერის ძირში გარდაცვლილი 6 ივლისს იპოვეს. რაიან სმიტის ცხედარი 7 ივლისს, ხევში მდებარე ჩანჩქერის მიმდებარე ტერიტორიაზე ნახეს. იქვე ახლოს ნახეს მათი კუთვნილი ნივთებიც, ჩანთაც და ფულიც. რამდენიმე საათის შემდეგ ნახეს მათი 4 წლის შვილის გვამიც.

რაიან სმიტი მეუღლესთან ერთად დაახლოებით 7 წელია, რაც საქართველოში, მარნეულში ცხოვრობდა და აზერბაიჯანული ხალიჩების ბიზნესით იყო დაკავებული.

პროკურატურის ვერსია

გამოძიების ვერსიით, 4 ივლისს, დაახლოებით 11:30 საათზე, დუშეთის რაიონში მდებარე ხადას ხეობაში, ალკოჰოლური ზემოქმედების ქვეშ მყოფი პირი შეხვდა ტურისტებს: ცოლ-ქმარსა და მათ 4 წლის შვილს, რომლებმაც სთხოვეს ეჩვენებინა მათთვის ხეობაში მდებარე ჩანჩქერი:

"გარკვეული მანძილის გავლის შემდეგ, ერთ-ერთი ჩანჩქერის სიახლოვეს, ურთიერთშელაპარაკების ნიადაგზე განაწყენებულმა მწყემსმა სანადირო თოფიდან, 4 წლის შვილისა და ცოლის თანდასწრებით, ორჯერ გასროლით მოკლა ქმარი".

ბრალდების თანახმად, დანაშაულის დაფარვის მიზნით, მან ქალისა და მისი მცირეწლოვანი შვილის მკვლელობა გადაწყვიტა.