დღეს, 12 ივნისს ნატოს გენერალურმა მდივანმა, იენს სტოლტენბერგმა, ბრიუსელში მიმდინარე ნატოს სამიტზე გამართულ პრესკონფერენიაზე, თავის სიტყვაში საქართველოს თავდაცვის რეფორმა შეაქო და მადლობა გადაუხადა ნატოს სტანდარტების დაკმაყოფილებისთვის.

"ნატო მხარს უჭერს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში, რომელიც მოიცავს აფხაზეთსა და სამხრეთ ოსეთს. გილოცავთ, ნატოს არსებული სტანდარტის დაკმაყოფილებას, რაც ეხება მთლიანი შიდა პროდუქტის (მშპ) 2%-ის დახარჯვას ეროვნულ თავდაცვაზე", - განაცხადა იენს სტოლტენბერგმა.

მსოფლიო ბანკის 2017 წლის მონაცემებით, საქართველოს ეროვნული თავდაცვის ხარჯები მთლიანი შიდა პროდუქტის 2,186%-ია. გრაფიკზე ჩანს, რომ თავდაცვის ხარჯები მშპ-ს 2%-ზე ნაკლები 2004 წლის შემდეგ არ ყოფილა. 2007 წელს ეს მონაცემი 9,157% იყო.

ბოლო რამდენიმე წლის განმავლობაში, თავდაცვითი ხარჯების გაზრდის საკითხი ალიანსის წევრებს შორის დაპირსიპირებისა და დისკუსიის საკითხია. 2014 წელს რუსეთის მიერ ყირიმის ანექსიის შემდეგ ალიანსის წევრებმა ხელი მოაწერეს შეთანხმებას, რომლის მიხედვითაც, ალიანსის წევრმა ყველა სახელმწიფომ, თავდაცვითი ხარჯები, მშპ-სთან მიმართებაში მინიმუმ 2 პროცენტამდე უნდა გაზარდოს. 2014 წლის შეთანხმების შესასრულებლად ნატოს წევრებს დრო 2024 წლამდე აქვთ, თუმცა ამ მიმართულებით წნეხი წლიდან წლამდე იზრდება.