შინაგან საქმეთა სამინისტროს ინფორმაციით, წლის ბოლომდე დაინერგება ელექტრონული სამაჯურები, რომლითაც მაღალი რისკის მატარებელი მოძალადეების ქცევის კონტროლი განხორციელდება.

უწყებაში ამბობენ, რომ 2018 წლის ბოლო 6 თვეში 3292 შემაკავებელი ორდერია გამოწერილი. შინაგან საქმეთა სამინისტროს ინფორმაციით, 2018 წლის პირველი იანვრიდან ამა წლის პირველ ივლისამდე ოჯახური ძალადობის 2804 საქმეზე დაიწყო გამოძიება.

მათივე განცხადებით, ოჯახური ძალადობის გამო სისხლისსამმართლებრივი დევნა დაიწყო 1933 პირის მიმართ. მათივე თქმით, ეს რიცხვი წინა მთელი წლის მონაცემებს უტოლდება. ოჯახური დანაშაულის ბრალდებით მიმდინარე წლის 6 თვის განმავლობაში დაკავებულია 1328 პირი.