პროკურატურაში ზაზა სარალიძის, მისი ადვოკატის და სახალხო დამცველის შეხვედრა დასრულდა. როგორც სახალხო დამცველმა, ნინო ლომჯარიამ განაცხადა, შეხვედრაზე გამოძიების მიმდინარეობა განიხილეს. ლომჯარიას თქმით, გამოძიების ინტერესებიდან გამომდინარე მიხეილ კალანდიას დაკავების საკითხზე ვერ ისაუბრებენ.

ლომჯარიას განცხადებით, პროკურატურაში პარლამენტის საგამოძიებო კომისიის რეკომენდაცია მიხეილ კალანდიას დაკავების შესახებ ოფიციალურად არ მიუღიათ. რეკომენდაცია საგამოძიებო კომისიამ 2 ივლისს გასცა.

სარალიძის პროკურატურაში შეხვედრა მას შემდეგ დაიგეგმა, როცა ის პროტესტის ნიშნად შინაგან საქმეთა სამინისტროს ეზოში დარჩა და მიხეილ კალანდიას დაკავება მოითხოვა. სარალიძემ შსს-ს ეზო მაშინ დატოვა, როცა მისი თქმით, მიიღო დაპირება, რომ კვირის ბოლომდე გამოძიება რადიკალურ ნაბიჯებს გადადგამდა.